Almatydaǵy Ál-Farabi dańǵylynda birneshe adamnyń ómirin qiǵan rezonansty jol-kólik oqiǵasy boiynsha aiyptalǵan azamatqa raqymshylyq qoldanylmaidy. Bul týraly Májilis kýlýarynda Ishki ister ministriniń orynbasary Sanjar Ádilov málimdedi, dep habarlaidy dalanews.kz.
Onyń aitýynsha, Ishki ister ministrligi atalǵan is boiynsha tergeýdi tolyq aiaqtap, materialdardy sotqa joldaǵan.
«Ishki ister ministrligi jazanyń bultartpastyǵy qaǵidatyn qamtamasyz etý boiynsha óz mindetin tolyq kólemde oryndady. Qylmystyq is materialdary sotqa joldandy. Oǵan qatysty raqymshylyq qoldanylmaidy. Taraptardyń tatýlasýy da múmkin emes», - dedi Ádilov.
Ministrdiń orynbasary bul qylmys aýyr sanattaǵy quqyq buzýshylyqtarǵa jatatyndyqtan, zań boiynsha taraptardyń tatýlasýyna jol berilmeitinin túsindirdi.
Sonymen birge ol kúdiktiniń jábirlenýshilerge keltirilgen materialdyq jáne moraldyq ziiandy óteýi nemese qarsy taraptyń ótinish berýi sot úkimine áser etýi múmkin ekenin atap ótti. Alaida mundai jaǵdailar qylmystyq jaýapkershilikten bosatýǵa negiz bolmaidy.
«Bul qylmystyq is aýyr sanatqa jatady. Sondyqtan mundai ister boiynsha tatýlasý qarastyrylmaǵan. Degenmen qarsy taraptyń ótinishi, keltirilgen materialdyq jáne moraldyq shyǵynnyń ótelýi jazany jeńildetetin mán-jai retinde eskerilýi múmkin», - dedi ministrdiń orynbasary.
Eske salaiyq, buǵan deiin Almatydaǵy Ál-Farabi dańǵylynda bolǵan jantúrshigerlik jol apaty qoǵamda úlken rezonans týdyrǵan bolatyn. Tergeý málimetinshe, joǵary jyldamdyqpen qozǵalǵan kólik jol apatyna ushyrap, saldarynan birneshe adam qaza tapqan.
