A.Kúrishbaev: «Jerdiń sapasyn bilmei, reforma jasaýǵa bolmaidy»
– Elimizde memlekettik kadastr, iaǵni jerdiń baǵasyn anyqtaý júiesi 2003 jyly, iaǵni 13 jyl buryn bekitilgen. Al damyǵan elderde ár 3-5 jylda jerdiń baǵasy jańartylyp otyrady. Jerdi baǵalaý júiesiniń ádistemesine kelsek, bizdiń mamandarymyz topyraqty zertteýde ótken ǵasyrdyń 50-shi jyldaryndaǵy ádistemelerdi qoldanady, – deidi A.Kúrishbaev.
Onyń aitýynsha, búginde aýyl sharýashylyǵy kásiporyndary men sharýa qojalyqtarynyń kóbisinde jerdiń tólqujattary joq ekeni anyqtalyp otyr. Aýyl sharýashylyǵy ministrligine jerdi monitoringileý fýnktsiiasy berilgen. Biraq ony atqaratyn mekeme joq. Respýblika boiynsha nebary 217 ǵana jer inspektory jumys isteidi.
– Sondyqtan qazir bizdiń eń basty mindetimiz – jer sapasynyń shynaiy jaǵdaiyn bilý. Jerdiń sapasyn bilmei, tiimdi júie qalyptastyryp almai, reformany qalai jasaimyz?, – dep atap kórsetti A.Kúrishbaev. Osy oraida ol maratoriidi bes jylǵa uzartý usynysyn tolyǵymen qoldaitynyn jetkizdi.
Aita keteiik, Jer komissiiasy aýyl sharýashylyǵy jerlerin jalǵa berý men satý máselesi boiynsha tiisti usynystardy daiarlap, ony Parlament qaraýyna usynady. Osynyń negizinde naqty sheshimder qabyldanady.
