Qasym-Jomart Toqaev ákimderdi synǵa alýda shekten shyǵatyn belsendilerge toqtaldy. Memleket basshysy olardyń áreketteri ákimderdiń óz mindetterin tiisti deńgeide oryndaýyna kedergi keltiretinin atap ótti, dep habarlaidy Dalanews.kz.
Prezidenttiń sózinshe, olardyń arasynda tipti qorqytyp-úrkitetinderi de bar.
“Qoǵamnyń ákimderge qoiatyn talaby qashan da joǵary. Bul – zańdy qubylys. Ákimniń jumysyna syn kózben qaraý – demokratiialyq qoǵamǵa tán qalypty nárse. Biraq synaǵannyń jóni osy eken dep, tym artyq ketetin ásire belsendiler de bar. Ózin bloger sanaityn keibir adamdar ákimniń ár qadamyn ańdýdy ádetke ainaldyrdy.
Jumysqa kedergi jasap, tipti, qoqan-loqy kórsetetinder bar. Árine, aýyl, aýdan nemese qala turǵyndary bolsyn, barlyǵy jaily ómir súrgisi keledi. Azamattarǵa barynsha qolaily jaǵdai jasaý – ákimge de, jergilikti máslihattarǵa da ortaq mindet, - dedi Toqaev.
Memleket basshysy ákimder halyqpen ashyq dialogqa daiyn bolýy qajettigin de eskertti.
“Árbir ákim azamattarmen dialogqa ashyq bolýy qajet, syndarly pikir almasa bilýi kerek. Biraq jurtty dúrliktirip, shý shyǵaryp, zańdy buzýǵa jol berilmeidi. Eshkim zańnan attamaýǵa tiis. Memleket múddesi túrli popýlisterdiń jeke múddesinen joǵary turýy qajet. Qoǵamnyń synynan jáne batyl sheshim qabyldap, jaýapkershilik alýdan qoryqpaý kerek.
Kez kelgen ózekti máselege, sonyń ishinde aqparattyq shabýyldarǵa der kezinde nazar aýdarý qajet. Taǵy da qaitalap aitamyn. Ákimdikter men máslihattardyń mindeti – memlekettik saiasatty qatań ustaný, ony el múddesine sai júzege asyrý. Máslihat depýtattarynyń jumysyndaǵy basym baǵyttarǵa qatysty meniń paiymym osyndai, - dedi ol.
