Kásipker Nurlan Bimýrzin Áliia Nazarbaevanyń reiderlik áreketteri týraly 20 jyl boiy nege aitpaǵanyn túsindirdi, - dep habarlaidy Dalanews.kz.
Bimýrzinniń sózinshe,20 jyl boiy bul is týraly jariia etýge eshkimniń kúshi jetpegen.
"Ony kim jariia qylar edi? Kerek adamdar bul jaily bildi. 21 jyl buryn jáne 2019 jylǵa deiin bizge muny jariia etýge kim ruqsat beretin edi? Gazetterge jariialaǵan kúnniń ózinde táýligine 25 saǵat, aptasyna 8 kún otbasymdy kúzetip júrýim kerek bolar edi. Qazir biz ádildik úshin kúresip júrmiz. Kóp adam biz ne úshin qylmystyq is qozǵalǵanyn talap etip júrgenimizdi túsinbei jatady. Zań boiynsha aryz jazyldy ma – qylmystyq is mindetti túrde qozǵalýy kerek. Tergeý júrýi kerek. Barlyq adam tergeýden ótýi kerek. Tergeý tolyq ótýi úshin Áliiadan da jaýap alynýy kerek. Biraq oǵan eshkimniń áli jetpeidi. Sondyqtan osyndai jaǵdai bolyp otyr", - deidi Nurlan Bimýrzin Elmedia-ǵa bergen suhbatynda.
Sonymen qatar, Bimýrzin biznes imperiiasynyń negizin qalaǵan ákesi týraly aitty.
"Ony atyp óltirip ketti. Menen kóp adam "bul jaǵdaiǵa kim kináli dep oilaisyń?" dep suraidy. Eshkimdi kinálamaimyn, buǵan bolǵan jait qana kináli. Eger bizdiń biznesimizdi tartyp almasa, mundai jaǵdai bolmas edi", - deidi kásipker.
Nurlan Bimýrzin qazirgi tańda Áliia Nazarbaevanyń reiderlik áreketine qatysty qylmystyq is qozǵaý amaldary qalai júrip jatqanyn aitty. Onyń sózinshe, Bas prokýratýra bul isti Almatynyń ishki ister basqarmasyna "laqtyryp" jibergen.
"Birinshiden, biz Bas prokýratýraǵa aryz jazamyz. Men joǵarydaǵylar óz aralarynda bul jaǵdaidy túsinip otyr dep oilaimyn. Aqyr sońynda bul is Bas prokýratýradan Almatydaǵy Almaly aýdandyq ishki ister basqarmasyna biraq túsken. Is ne úshin ol jerge túskenin túsinbedik, qurysynshy dedik. Barlyq dálel bazasyn kórsettik. Al birneshe kúnnen keiin ol jerden qylmystyq is qozǵalmaityny týraly raport aldyq. Almaly aýdandyq prokýratýraǵa aryzdandyq, olar ishki ister basqarmasynyń sheshimin joqqa shyǵardy. Sosyn is Almatynyń Ekonomikalyq tergeý basqarmasyna tústi. Biz bul áreketterine tańǵaldyq", - deidi kásipker.
Aita keteiik, biyl 28 aqpanda "TPK Asia" JShS quryltaishysy Nurlan Bimýrzin seriktesi Megdat Qaliev ekeýi Nazarbaeva men Rogovanyń reiderlik shabýylynyń qurbany bolǵanyn málimdegen bolatyn.
Bimýrzinniń aitýynsha, 2003 jyly Áliia Nazarbaeva óz yqpalyn paidalana otyryp, quny 170 million dollar bolatyn (2003 jylǵy esep boiynsha - esk.) jeti munai bazasy men 96 janarmai quiý beketin tartyp alǵan.
"Basynda qarjy politsiiasy qysym kórsetti. Sosyn Áliia Nazarbaevanyń ókili kelip, bizge qorǵan bolýǵa shamalary jetetinin jetkizdi. Ol úshin biznestiń 50 paiyzy berilýi keregin aitty. Bir jyldan keiin Áliia Nazarbaeva endi qalǵan úlesti de berý keregin eskertti. Sol jyly meniń ákemdi olar alyp ketip, Nazarbaevanyń keńsesine aparǵan. Ákemmen sóilesken. Eki ulyń úshin alańdasań, biznesińdi ber degen. Amal joq, ákem kelisedi.
Kelesi kúni men bardym. Ol jerde Áliia bolǵan joq, biraq onyń ornyna Rogova boldy. Men sol jerde úlesimdi bar joǵy 18 125 teńgege satýǵa májbúr boldym", - deidi Nurlan Bimýrzin.
14 naýryzda Bas prokýratýra Nazarbaevanyń reiderlik áreketi týraly aryzyn tirkegenin habarlady. Alaida 5 sáýirde politsiia eks-prezidenttiń kenje qyzyna qatysty qylmystyq is qozǵaýdan bas tartqany belgili boldy.
