Dástúrli ánshi, ónertanýshy Erlan Tóleýtai 60 jyl boiy "qazaqty sorlatqandar" kimder ekenin atady, - dep habarlaidy Dalanews.kz.
Buǵan deiin mádeniet salasynyń bilgiri Erlan Tóleýtai Qonaev týraly aitqandary úshin synǵa qalǵan edi, tipti sottasqysy kelgender de bolǵan.
"12 qańtar maqalalar shyǵa bastaidy: "Qonaevym-ai, danyshpanym-ai, kemeńgerim-ai". Qonaevtan kýlt jasaý áli jalǵasyp jatyr. Bir kúsh bir kúshti týdyrady. Qonaev qazaqqa asa bir jaqsylyq jasaǵan adam emes. Eski Qazaqstannyń ókili Nazarbaev 30 jyl biledi. Arǵy jaǵynda bilikke alyp kelgen ustazy Qonaev qoi. Qaraǵandyda Nazarbaevty alyp kelgen 5 adam bolǵan.
Qarasam, Qonaev biligi 30 jylǵa sozylǵan, shirek ǵasyr. Arasynda Kolbinniń 1-2 jyl júrgeni bar. Sonda bul eki adam 60 jyl bilik qurǵan. Ákeli-balaly qazaqty sorlatqan. Qazaqty sorlatyp ketpei nemene?! Nazarbaevty sol alyp keldi. Nege Áýelbekovti alyp kelmedi? 60 jyl degen - bir zaman. Muny qazaq "kishi zaman" deidi. Úsh júz jyldy "uly zaman" deidi.
...Qazaqstandaǵy 750 mektepti japqan - Qonaev. Qazaqstandy iadrolyq poligonǵa ainaldyrǵan - Qonaev. Abaidyń jerinde, Taisoiǵanda. 15 odaqtas respýblikada poligonǵa ainalǵan bir-aq respýblika bar. Baltyq boiyna baryńyz, bir poligon joq. Qonaev zamanyn zerttegen adammyn, Qonaev zamanynda qazaq qul bolyp ketti. Kremlge qolaily adam boldy", - dedi Bilgen Durys arnasy bergen suhbatynda.
Aita keteiik, buǵan deiin de Erlan Tóleýtai eldegi kadr máselesine de toqtaldy. Onyń aitýynsha, bilik ar-uiaty biik adamdarǵa muqtaj.
"Qazir Nazarbaevtyń kadrlary kelip jatyr. Olarda ujdan joq. Tek yldym-jyldym. Túk bilmeitin standart adamdar. Ne óndiristi bilmeidi, ne kisilik qarym-qatynas joq. Basqarýdy bilmeidi, uiymdastyrýshylyq qabileti joq.
...Qazir yldym-jyldymdar, kóz oinaǵandar, jyrpyldaǵandar, ótirik sóileitinder - solar kelip jatyr. Kadr saiasaty da óte qiyn jaǵdaida. Óitkeni Nazarbaevqa eliktep ósken býyn sol siiaqty sóileidi, júredi, sol siiaqty kózin alaqtatady, sol siiaqty ekilenip sóileidi. Osy turǵydan kelgende ózgeris joq. Bilikke ujdandy adamdar kelýi kerek", - deidi qazaq óneriniń janashyry ASSYLTAS TV-ǵa bergen suhbatynda.
