Almatyda ál-Farabi dańǵyly boiyndaǵy Akademqalashyq turǵyndary úileriniń irgesinde josparlanǵan qurylysqa qarsy shyǵyp, bilikten kómek suraǵan edi. Áleýmettik jelide taraǵan beineúndeýde olar jańa nysannyń qala qurylysy normalaryna qaishy keletinin aitqan. Osyǵan bailanysty Saba Group kompaniiasynyń prezidenti Iliias Karbozov túsinikteme berdi, dep habarlaidy Dalanews.kz.
Kompaniia tóraǵasynyń sózinshe, jer telimi núkteli qurylysqa jatpaidy. Bul jergilikti jáne sheteldik investorlardyń qatysýymen júzege asyrylyp jatqan investitsiialyq joba. Onyń aiasynda kópdeńgeili avtoturaq, jasyl aimaqtar men demalys alańdary, kólik jáne jaiaý júrginshi joldary qarastyrylǵan.
“Joba maqsaty: qalanyń infraqurylymyn damytý, jańa jumys oryndaryn ashý jáne salyq túsimderin arttyrý. Almatyda týrizm qarqyndy damyp keledi, ári kelýshiler sany da jyl saiyn ósip jatyr. Ókinishke qarai, qonaqúilerdiń kóbi tozǵan, qazirgi nómirler zaman talabyna sai emes. Sondyqtan jańa nysan týristerge qolaily jaǵdai jasaýǵa baǵyttalǵan”, – deidi Karbozov.
Aitýynsha, qurylys jobasy Almaty qalasynyń jańa qurylys erejelerine sai daiyndalǵan jáne qala qurylysy keńesiniń oń qorytyndysyn alǵan.
Sonymen qatar ol joba turǵyndardyń pikirinen keiin qaita qaralyp, birqatar túzetý engizilgen atap ótti.
“Bastapqyda toǵyz qabatty ǵimarattar salý kózdelgen edi. Biraq turǵyndardyń ótinishinen keiin biz jobany ózgertip, biznes ortalyqtyń biiktigin bes qabatqa deiin tómendettik. Sonymen qatar qonaqúidiń ornalasý baǵyty da ózgertildi”, – dedi kompaniia basshysy.
Tipti kompaniia ókilderi turǵyndarmen birneshe ret kezdesip, olardyń ótinishterin eskergen.
“Jergilikti turǵyndar “jol men ótkel jabylyp qalady” dep ýaiymdady. Qazir biz sol ótkel men joldy qalpyna keltirdik, tipti jańa jaiaý júrginshiler jolyn jasadyq. Bas josparda bári naqty kórsetilgen: turǵyndar óz úilerine erkin qatynai alady, kólikter úshin de bólek ainalma jol qarastyrylǵan”, – dedi ol.
Tektonikalyq jarylym jáne qaýipsizdik
Kompaniia jer ýchaskesiniń tektonikalyq turǵydan qaýipsiz ekenin de atap ótti.
“Keibir turǵyndar bul aýmaq tektonikalyq jarylym aimaǵynda ornalasqan dep aitypty. Biraq bul aqparat shyndyqqa janaspaidy. Resmi karta boiynsha jarylym joldyń arǵy betimen ótedi, bizdiń jerge qatysy joq”, – dedi Karbozov.
Injenerlik jeliler men qujattar
Saba group tóraǵasynyń aitýynsha, qurylysqa deiingi barlyq injenerlik jeliler men qujattar muqiiat zerttelgen.
“Jerdi satyp almas buryn biz barlyq tehnikalyq jáne zańdy qujattardy tekserdik. Ýchaskeniń maqsatty nysanaly paidalanýy men josparlaý jobasy qalanyń Bas josparyna tolyq sai. Injenerlik jelilerdiń bári bólek ornalasqan, turǵyn úilerdiń júielerine eshqandai júkteme túspeidi”, – dep túsindirdi ol.
Qazir joba ózgergendikten, kompaniia ony qaitadan memlekettik saraptamadan ótkizýdi josparlap otyr.
“Biz jobany jańarttyq, sondyqtan qaita saraptamaǵa jiberemiz. Qujattar tolyq rásimdelgen soń ǵana qurylys bastalady”, – dedi ol.
Qurylys merzimi
Kompaniia qurylys jumystaryn 2026 jyldyń ekinshi toqsanynda bastaýdy kózdep otyr.
“Bir jarym jyldyń ishinde nysandy tolyq aiaqtaimyz”, – dedi Karbozov.
Aitýynsha, jerdegi kógaldarǵa qatysty da turǵyndardyń ýaiymy eskerilgen.
“Iá, belgili bir bóligi, shamamen 400 aǵash pen butany alyp tastaimyz. Biraq ornyna 4 myńnan astam aǵash pen gúlzarlar otyrǵyzylady. Bul — zańǵa sai ótemdik kógaldandyrý sharasy. Bizdiń maqsat aimaqty kórkeitip, demalýǵa qolaily aimaq qalyptastyrý”, – dedi ol.
Kompaniianyń turǵyndarmen bailanysy
Kompaniia turǵyndarmen tikelei bailanys ornatqanyn da málimdedi.
“Biz turǵyndarmen únemi bailanystamyz. Vatsap chat bar, onda bizdiń ókilder barlyq suraqqa jaýap beredi. Kópshiligi kezdesýge kelmeidi. Alaida biz juma kúni ákimdik ókilderimen birge taǵy bir kezdesý ótkizýdi josparlap otyrmyz. Maqsatymyz ózara túsinistikke kelý”, – deidi SABA GROUP direktory.
Almaty ákimdiginiń jaýaby
Aita keteiik, kúni keshe bul máselege qatysty Almaty qalasy ákiminiń orynbasary Beibit Shahanov túsinikteme bergen edi.
Onyń aitýynsha, atalǵan nysan qala qurylysy qujattaryna tolyq sáikes keledi, jáne ázirge zańdylyǵyna qatysty kúmán joq.
“Bul jobany júzege asyrýǵa aldyn ala ruqsat bar, sebebi ol qalanyń bas jospary men detaldy josparlaý qujattaryna sai keledi. Munda keńseler men qonaqúi salynady, al turǵyn úi túrindegi núkteli qurylysqa jol berilmeidi”, – dedi ákim orynbasary.
Sonymen qatar Shahanovtyń aitýynsha, qala ákimdigi qurylys kompaniiasynan kórshi úilerdiń turǵyndarymen kelisip, olardyń qolaily ómir súrý jaǵdaiyn saqtaýdy talap etken.
Buǵan deiin
Eske salaiyq, buǵan deiin ál-Farabi dańǵyly boiyndaǵy Akademiialyq qalashyq turǵyndary úileriniń irgesindegi jańa qurylysqa qarsy shyqqan bolatyn.
Olar Prezidentke beineúndeý joldap, daýly aýmaqtaǵy nysannyń qala qurylysy normalaryn buzyp jatqanyn málimdegen. Turǵyndar qurylys júrgiziletin jerdi memleket menshigine qaitaryp, onyń ornyna demalys aimaǵy men tótenshe jaǵdaida jinalatyn alań salýdy usynǵan edi.
Aitýlarynsha, qurylys aimaǵy seismoqaýipti jáne tektonikalyq jaryq ústinde ornalasqan, sondai-aq ol aýdannyń tabiǵi jeldetilýin shektep, injenerlik infraqurylymǵa salmaq túsirýi múmkin.
Turǵyndar qoǵamdyq tyńdaýlardyń ótkizilmegenin aityp, qurylysqa resmi kelisim bermegenderin jetkizgen.
