Mádeniet jáne aqparat ministri Aida Balaeva áieli Saltanat Núkenovany óltirdi dep aiyptalǵan Qýandyq Bishimbaevtyń isinie qatysty pikir bildirdi, dep habarlaidy Dalanews.kz.
Ministr sot otyrysynyń ashyq formatta ótip jatqanyn jáne barlyǵy zań boiynsha qaralatynyn atap ótti.
"Sot ádil sheshim shyǵaratynyna senimdimin. Memleket basshysy aityp otyrǵan zań men tártip ústemdigi qamtamasyz etiledi. Áiel retinde de, ana retinde de Saltanattyń jaqyndary men anasynyń qaiǵysyna ortaqpyn. Ony uryp-soqqan jantúrshigerlik beineni kórý - óte aýyr", - dedi Aida Balaeva Vremia gazetine bergen suqbatynda.
Aitýynsha, Saltanat otbasylyq zorlyq-zombylyqtan zardap shekken jandardyń temirqazyǵyna ainaldy.
"Ashyq sot qylmyskerlerdi zorlyq-zombylyqtan tyiyp, kóptegen adamnyń ómirin saqtap qalady dep senemin. Men barlyq qyzǵa, barlyq áielge úndeý jasaǵym keledi. Bir ret qol kótergen adam ózgeredi dep aldamshy oidyń jeteginde júrýge bolmaidy. Ol ózgermeidi! Eger áieldi uryp-soǵýǵa, kemsitýge qabiletti bolsa, ol adamgershilikten de ada", - dedi Aida Balaeva
Osy tusta ministr zorlyq-zombylyqqa jol bermeýge shaqyrdy.
"Shydaýdyń, sen ony, ol seni súiedi, balalar úshin tózý qajet dep, ózińdi de, ony da aldaýdyń keregi joq. Ajyrasý - uiat emes. Maǵan senińiz, uryp-soǵý tek jiilep, kúsheie beredi. Jazadan jaltarý árqashan keleńsizdik týdyrady. Adamnyń qadir-qasietin qorlaýǵa, ásirese, uryp-soǵýǵa eshkimniń quqyǵy joq. Taǵy qaitalap aitamyn: sottyń ádil sheshim shyǵaratynyna senimdimin", - dedi ol.
Eske salaiyq, eks-ministr Qýandyq Bishimbaetyń isi elordanyń qylmystyq ister jónindegi mamandandyrylǵan aýdanaralyq sotynda qaralyp jatyr. Sot tóraǵasy - Aijan Qulbaeva. Sot protsesin kópshilik tikelei efirde tamashalaýda.
Al qazaqstandyqtar áleýmettik jelilerde azappen qaza tapqan Saltanat Núkenovanyń otbasyn qoldaýǵa arnalǵan aktsiialar men fleshmobtar ótkizip, petitsiialar jazyp jatyr.
