Air Astana qyzmetkeri jolaýshy men onyń otbasy músheleriniń áýe saparlary týraly málimetterdi sotqa usynǵan. Bul aqparatqa ol áýe kompaniiasyndaǵy qyzmeti arqyly qol jetkizgen. Sot muny azamat pen onyń týystarynyń jeke derekterin jariia etý dep baǵalady, dep habarlaidy dalanews.kz jýrnalist Mihail Kozachkovqa silteme jasap.
Oqiǵa Shymkenttegi sottardyń birinde qaralǵan qarjylyq daýǵa bailanysty belgili bolǵan. Talapker qarsy taraptyń materialdyq jaǵdaiyn kórsetý úshin onyń barlyq áýe saparlary men jaqyn týystarynyń ushýlary týraly málimetterdi sotqa tapsyrǵan.
Belgili bolǵandai, buǵan deiin áieldiń advokaty resmi túrde Air Astana kompaniiasyna suraý joldap, osy aqparatty berýdi talap etken. Alaida áýe kompaniiasy mundai málimetti jariialaýdan bas tartqan. Soǵan qaramastan derekter keiin talapkerdiń qolyna túsip, is materialdaryna tirkelgen.
Nátijesinde sot talap aryzdy qanaǵattandyrýdan bas tartyp, Shymkent prokýratýrasynyń atyna jeke qaýly shyǵardy. Endi qadaǵalaý organy áýe kompaniiasy qyzmetkeriniń áreketinde jeke derekterdi zańsyz jinaý jáne taratý belgileri bar-joǵyn tekserýi tiis.
Qazaqstan Respýblikasynyń Qylmystyq kodeksiniń 147-babyna sáikes, jeke ómirge qol suǵý jáne derbes derekter týraly zańnamany qyzmettik jaǵdaiyn paidalanyp buzý bes jylǵa deiin bas bostandyǵynan aiyrý jazasyna ákelýi múmkin.
