Premer-ministrdiń orynbasary – Mádeniet jáne aqparat ministri Aida Balaeva halyqaralyq mýzykalyq baiqaýlarda jeńiske jetken qazaqstandyq jas ónerpazdarmen kezdesti, dep habarlaidy dalanews.kz.
Kezdesýge «Vitebskidegi slavian bazary» halyqaralyq festivaliniń jeńimpazdary Aqerke Amaliat, Jasmina Túzelova, sondai-aq Italiiadaǵy halyqaralyq baiqaýda top jarǵan jas violonchelshi Alen Básen, olardyń ata-analary men ustazdary qatysty.
Aida Balaeva Memleket basshysy adami kapitaldy damytýǵa erekshe kóńil bóletinin atap ótti. Onyń aitýynsha, mádeniet pen óner jas urpaqty tárbieleýde jáne ulttyq biregeilikti nyǵaitýda mańyzdy ról atqarady. Sondyqtan daryndy balalardy qoldaý – eldiń bolashaǵyna salynǵan investitsiia.
Ministr halyqaralyq sahnada joǵary nátije kórsetken jas ónerpazdardyń jetistigi olardyń talantymen qatar, ustazdarynyń kásibi eńbegi men ata-analarynyń qoldaýynyń jemisi ekenin aitty.
Biyl Aqerke Amaliat «Vitebskidegi slavian bazary» XXXV halyqaralyq óner festivaliniń estradalyq án oryndaýshylar baiqaýynda I oryn ielenip, «Lira» arnaiy syilyǵyn jeńip aldy.
Al Jasmina Túzelova osy festivaldiń balalar baiqaýynda II orynǵa ie boldy. Sondai-aq oǵan avtorlyq án jazýǵa múmkindik beretin arnaiy sertifikat tabystaldy.
Alen Básen Italiiada ótken Rovere d’Oro XXXVII halyqaralyq mýzyka baiqaýynda «Jas talanttar» atalymynyń óz jas sanatynda 100 upaidyń 100-in jinap, Primo Premio Assoluto bas júldesin jeńip aldy.
Kezdesý barysynda halyqaralyq baiqaýlar jeńimpazdarynyń ustazdary men ata-analarynyń eńbegi de erekshe atalyp ótti. Jas ónerpazdar halyqaralyq dodalardan alǵan áserlerimen bólisip, memleket tarapynan kórsetilip jatqan qoldaý jańa jetistikterge jigerlendiretinin aitty.
