Astanada tún jarymynda oryn alǵan qaiǵyly oqiǵa elorda turǵyndaryn dúr silkindirdi. 21 jastaǵy jigit 28 jastaǵy nemere aǵasyn azaptap óltirip, taǵy úsh jaqynyn pyshaqtap, aýyr jaraqat salǵan dep jazady Dalanews.kz.
Aldyn ala málimet boiynsha, janjalǵa kompiýterlik oiyn sebep bolǵan.
Qaiǵyly jaǵdai elordadaǵy Mustafin kóshesindegi páterde oryn alǵan. Úide apaly-sińili áielder birge turǵan. Ekeýiniń balalary jáne aǵalarynyń 21 jasar uly Janǵali Jumataev ta sol úidi panalaǵan.
Janǵali esh jerde jumys istemegen, kúnuzaqqa smartfonǵa telmirip, atyshýly Standoff 2 degen oiyndy oinaýmen ýaqyt ótkizgen. Bul oiyn shynaiy urys alańyna uqsas, negizinen jaýdyń kózin joiý, granata laqtyrý, pyshaqpen shabýyl jasaý sekildi qantógiske toly, qatygez áreketterdi beineleidi.
Tergeýshilerdiń boljamyna sai, qandy oqiǵa oryn alǵan túnde Janǵali tas qarańǵyda, tún ortasyna deiin smartfonmen atys-shabys oiynyn oinap otyrǵan.
Shamamen, saǵat tili túngi úshterden aýǵanda, tátesi odan "telefonyńdy óshirip, uiyqtasańshy" dep ótinish jasaidy. Úi-ishindegilerdi smartfonnyń jaryǵy men dybysy mazalap, tynyǵýǵa múmkindik bermegen. Alaida Jumataev ápkesiniń eskertýin elemei, oiyndy ári qarai da jalǵastyra beredi. Keiin tátesi qaita ainalyp kelip, telefondy sóndirýdi buiyrǵan kezde arada aiǵai-shý shyqqan.
Barlyǵy ornyna jaiǵasyp, qalyń uiqyǵa ketken ýaqytta Janǵali asúiden "sýyq qarý" alyp, ózinen jeti jas úlken nemere aǵasyna (tátesiniń ulyna) pyshaq jumsaidy. Aldyn ala málimet boiynsha, marqumǵa jiyrma jerden pyshaq jaraqaty tigen. Jedel járdem oqiǵa ornyna jetip úlgergenshe, 28 jastaǵy azamat jan tapsyrǵan.
Qylmysker jan daýsy shyqqan jas balanyń daýysynan shoshyp oianyp, óre túregelgen úidegilerge de pyshaq ala júgirgen. Qandyqoldyń tyrnaǵyna ilikken úi ieleri, ápkeli-sińlili áielder men nemere sińlisi bas,keýde jáne arqa tusynan aýyr jaraqat alǵan. Qazirgi tańda úsheýi de aýrýhanada em qabyldap jatyr. Dárigerler olardyń ómirine qaýip tóndirgen jaralardyń aýyrlyǵyn atap ótýde, alaida bar kúshterin salyp, em-dom jasap jatqandaryn málimdedi. Marqum 28 jastaǵy azamat jedel járdem jetkenshe qan kóp joǵaltqan.
Kúdikti Janǵali Jumataev oqiǵa ornynda ustalyp, ýaqytsha ustaý izoliatoryna qamaldy. Tergeý amaldary bastalyp, oǵan «Adam óltirý» jáne «Adam óltirýge oqtalý» baptary boiynsha aiyp taǵylǵany habarlandy.
Quqyq qorǵaý organdary men psihologtar oiynǵa shekten tys berilip ketýdiń, ásirese áli buǵanasy bekip úlgermegen jasóspirimder men jastarǵa qaýipti ekenin jii eskertedi. Qazirgi tańda tergeý jalǵasýda, sarapshylar qandy shabýylǵa naqty ne túrtki bolǵanyn anyqtap, isti sotqa joldaityny kútilip otyr.
