AES salý máselesine qatysty Ulttyq Referendým 6 qazanda ótedi, - dep habarlaidy Dalanews.kz.
«Atom elektr stansasyn salý máselesine qatysty jalpyulttyq referendým biylǵy 6 qazanda ótedi. Búgin tiisti Jarlyqqa qol qoiamyn. Aldaǵy referendým keń aýqymdy jalpyulttyq dialogtyń taǵy bir aiqyn kórinisi bolmaq. Shyn máninde, bul – «Halyq únine qulaq asatyn memleketke» tán sipat. Biz osyndai qadamdar arqyly jańa qoǵamdyq-saiasi mádeniettiń negizin qalaimyz. Mańyzdy memlekettik sheshimder qabyldaýdyń jańa úlgisin jasaimyz», - dedi Toqaev.
Prezident qazir álemde energiia tapshylyǵy kúsheiip bara jatqanyn aitty. Elimizge senimdi jáne ekologiialyq taza qýat kózderi asa qajet.
«Biz atom energetikasyn damytýǵa basa mán berýimiz kerek dep oilaimyn. Sebebi ekonomikamyz kún ótken saiyn mol energiiany qajet etýde. Mundai suranysty atom energetikasy qamtamasyz ete alady. Qazir damyǵan jáne damýshy 30 memlekette 200-ge jýyq atom elektr stansasy jumys istep tur. Biz elimizdiń ózine tán ereksheligin jáne uzaq merzimge arnalǵan ulttyq múddelerimizdi eskere otyryp, tek alǵa qarai júrýimiz qajet. Bir sózben aitsaq, bolashaqty oilaýymyz kerek. Sondyqtan men atom elektr stansasyn salýǵa qatysty barynsha baiypty sheshim qabyldaý qajettigin udaiy aityp kelemin. Strategiialyq josparlardy qoǵamda keńinen talqylaý kerek dep sanaimyn. El ómirindegi árbir mańyzdy qadam jurtshylyqpen birlesip jasalýǵa tiis. Atom elektr stansasy týraly referendýmǵa qatysty da dál solai bolýy kerek. Byltyr men bul másele boiynsha óz pikirimdi aittym, iaǵni, referendým taqyrybynyń qoǵam talqysyna túskenine bir jyl boldy. Bul azamattarymyzdyń jan-jaqty oilanyp, salmaqty sheshim qabyldaýyna jetkilikti merzim dep oilaimyn. Sondyqtan men Úkimettiń usynysyn qoldaimyn», -dedi Memleket basshysy.
Respýblikalyq referendýmǵa qatysýǵa quqyǵy bar azamattardyń tiziminde ózińizdi qalai tekserýge bolady?
