Advokat Tursynbek Káripbai májilis depýtaty Jigýli Dairabaev Muhtar Ábliazovpen sybailas bolǵanyn aitty, - dep habarlaidy Dalanews.kz.
Advokat Dairabaevqa qatysty jer daýy týraly áńgimelep berdi.
"Men halyqpen jerdi qaitarýǵa kómektesemin dep kelisimge otyrdym. Ol kezinde halyqtyń 1991, 1992 jyldan 2000-jyldarǵa deiin alǵan jerleri. 2004 jyly Dairabaev Kazexim-Pobeda, Kazexim-Keńes, Kazexim-Jaras, Kazexim-Merke, Kazexim-Birlik dep bes uiym ashqan. 174 adam Kazexim-Keńeske jer ótkizip, Dairabaev túsken kiristen paidasyn bólip beremiz dep, jerdi alǵan. Jigýli Dairabaev kompaniia tóraǵasy bolǵan. Osylaisha júzdegen adammen kelisimge otyrǵan", - deidi advokat Almasbek Sadyrbaevqa bergen suhbatynda.
Tursynbek Káripbaidyń sózinshe, jalpy 469 adamnyń jeri Jigýli Dairabaevtyń qaramaǵyna ótken.
"Qujattarda Jigýlidiń qoly tur, onda 25 paiyz úles beretini de jazylǵan. 469 adamnyń qolynda memlekettik akti qujaty bolǵan. Alaida ol Dairabaevtyń qolyna túskennen keiin joq bolǵan. Sol kezdegi Merki aýdanynyń ákimi 2004 jyly 31 jeltoqsanda halyqty jer quzyrynan aiyryp, qaýlyǵa qol qoiady. 10 700 gektar jerdi bes uiymǵa berip jiberedi. Osydan keiin Dairabaev ne isteidi? Ol 2005-2006 jyldary sol kompaniialardyń direktory bolǵan. Eki jyldyń ishinde halyqtyń aýzyn jabý úshin azdap úlesin berip otyrady. Biraq ol kezde halyq jerdiń bári bes uiymǵa ótip ketkeni týraly qaýly shyqqanyn bilmeidi. Qarapaiym halyq kelisim berdi-mys qylyp alady", - deidi Tursynbek Káripbai.
Artynsha bes uiymnyń ishinde Kazexim-Merkege qatysty qujattar joǵalyp, tórt kompaniianyń qujattary ǵana qalady eken.
"Dairabaev tórt kompaniianyń jerlerin olardyń eń basynda turǵan Kazexim-ge beredi. Sebebi quryltaishy jarǵy boiynsha jerdiń 75 paiyzyn alsa, halyqqa jerdiń 25 paiyzy ǵana qalady eken. Kazexim-niń basynda otyrǵan adamdar sottaldy, ony bilesizder. Onyń ishinde, Ábliazov jáne taǵy úsh adam bar. Olar jazasyn ótep shyqty, biraq jer qaitarylǵan joq. Al Kazexim-Pobeda, Kazexim-Keńes, Kazexim-Jarastyń jerleri kepilge qoiylyp ketken. Jerler BTA-bankqa qoiylǵan. Iaǵni halyqtyń jeri kepil retinde bankke qoiylǵan. BTA banktan 1,5 milliardtai aqsha shyǵarylǵan, biraq bári Ábliazovpen offshorǵa ketip qalǵan", - deidi advokat.
