ادۆوكات تۇرسىنبەك كارىپباي ءماجىلىس دەپۋتاتى جيگۋلي دايرابايەۆ مۇحتار ابليازوۆپەن سىبايلاس بولعانىن ايتتى، - دەپ حابارلايدى Dalanews.kz.
ادۆوكات دايرابايەۆقا قاتىستى جەر داۋى تۋرالى اڭگىمەلەپ بەردى.
"مەن حالىقپەن جەردى قايتارۋعا كومەكتەسەمىن دەپ كەلىسىمگە وتىردىم. ول كەزىندە حالىقتىڭ 1991، 1992 جىلدان 2000-جىلدارعا دەيىن العان جەرلەرى. 2004 جىلى دايرابايەۆ Kazexim-پوبەدا، Kazexim-كەڭەس، Kazexim-جاراس، Kazexim-مەركە، Kazexim-بىرلىك دەپ بەس ۇيىم اشقان. 174 ادام Kazexim-كەڭەسكە جەر وتكىزىپ، دايرابايەۆ تۇسكەن كىرىستەن پايداسىن ءبولىپ بەرەمىز دەپ، جەردى العان. جيگۋلي دايرابايەۆ كومپانيا ءتوراعاسى بولعان. وسىلايشا جۇزدەگەن اداممەن كەلىسىمگە وتىرعان"، - دەيدى ادۆوكات الماسبەك سادىربايەۆقا بەرگەن سۇحباتىندا.
تۇرسىنبەك كارىپبايدىڭ سوزىنشە، جالپى 469 ادامنىڭ جەرى جيگۋلي دايرابايەۆتىڭ قاراماعىنا وتكەن.
"قۇجاتتاردا جيگۋليدىڭ قولى تۇر، وندا 25 پايىز ۇلەس بەرەتىنى دە جازىلعان. 469 ادامنىڭ قولىندا مەملەكەتتىك اكتى قۇجاتى بولعان. الايدا ول دايرابايەۆتىڭ قولىنا تۇسكەننەن كەيىن جوق بولعان. سول كەزدەگى مەركى اۋدانىنىڭ اكىمى 2004 جىلى 31 جەلتوقساندا حالىقتى جەر قۇزىرىنان ايىرىپ، قاۋلىعا قول قويادى. 10 700 گەكتار جەردى بەس ۇيىمعا بەرىپ جىبەرەدى. وسىدان كەيىن دايرابايەۆ نە ىستەيدى؟ ول 2005-2006 جىلدارى سول كومپانيالاردىڭ ديرەكتورى بولعان. ەكى جىلدىڭ ىشىندە حالىقتىڭ اۋزىن جابۋ ءۇشىن ازداپ ۇلەسىن بەرىپ وتىرادى. ءبىراق ول كەزدە حالىق جەردىڭ ءبارى بەس ۇيىمعا ءوتىپ كەتكەنى تۋرالى قاۋلى شىققانىن بىلمەيدى. قاراپايىم حالىق كەلىسىم بەردى-مىس قىلىپ الادى"، - دەيدى تۇرسىنبەك كارىپباي.
ارتىنشا بەس ۇيىمنىڭ ىشىندە Kazexim-مەركەگە قاتىستى قۇجاتتار جوعالىپ، ءتورت كومپانيانىڭ قۇجاتتارى عانا قالادى ەكەن.
"دايرابايەۆ ءتورت كومپانيانىڭ جەرلەرىن ولاردىڭ ەڭ باسىندا تۇرعان Kazexim-گە بەرەدى. سەبەبى قۇرىلتايشى جارعى بويىنشا جەردىڭ 75 پايىزىن السا، حالىققا جەردىڭ 25 پايىزى عانا قالادى ەكەن. Kazeximء-نىڭ باسىندا وتىرعان ادامدار سوتتالدى، ونى بىلەسىزدەر. ونىڭ ىشىندە، ءابليازوۆ جانە تاعى ءۇش ادام بار. ولار جازاسىن وتەپ شىقتى، ءبىراق جەر قايتارىلعان جوق. ال Kazexim-پوبەدا، Kazexim-كەڭەس، Kazexim-جاراستىڭ جەرلەرى كەپىلگە قويىلىپ كەتكەن. جەرلەر بتا-بانكقا قويىلعان. ياعني حالىقتىڭ جەرى كەپىل رەتىندە بانككە قويىلعان. بتا بانكتان 1،5 ميللياردتاي اقشا شىعارىلعان، ءبىراق ءبارى ابليازوۆپەن وففشورعا كەتىپ قالعان"، - دەيدى ادۆوكات.
