Atyraýda Muqanǵalievter otbasynyń ólimine qatysty sot protsesi qoǵam nazaryn aýdaryp otyr. Qaza tapqandardyń týysy Ádemi Muqanǵalieva baýyrynyń otbasy joǵalǵannan keiin politsiiaǵa ózi júgingenin aityp, istiń mán-jaiyna qatysty pikir bildirdi, dep habarlaidy dalanews.kz.
Onyń sózinshe, 25 jeltoqsan kúni ol politsiiaǵa baryp, aǵasynyń otbasy joǵalyp ketkenin habarlaǵan. Ádemi baýyryn sońǵy ret qyrkúiek aiynda kórgenin, keiin onymen jii telefon arqyly sóilesip turǵanyn aitty. Alaida keiin belgili bolǵandai, qarasha aiynan bastap aǵasynyń telefonynan Sultan jazyp otyrǵan bolýy múmkin.
"Baýyrymdy sońǵy ret qyrkúiekte kórdim, telefon arqyly jii habarlasyp turatynbyz. Al qarashadan bastap aǵamnyń telefonynan Sultan jazǵan eken. Sultan men Aqbaiandy jaqsy tanimyn. 2023 jyly Aqbaian ákemniń týǵan kúnine keldi, Sultan bolǵan joq. Keiin olar ajyrasyp ketti. Buǵan ne sebep bolǵanyn bilmeimin", – dedi Ádemi Muqanǵalieva.
Marqumnyń týysynyń aitýynsha, aǵasy men onyń jubaiy Sultan men Aqbaianǵa únemi kómektesip kelgen. Ol baýyrynyń otbasyn qarapaiym, eńbekqor jandar retinde sipattady.
"Baýyrymnyń otbasy qarapaiym edi. Óz eńbekterimen kún kórdi, bárin ózderi tapty. Zeinetaqymen jáne mal sharýashylyǵymen ómir súrdi. Barynsha bárine kómektesetin. Naýryz óte meiirimdi, eńbekqor adam edi. Meiramgúl úshinshi toptaǵy múgedek bolatyn, úide otyratyn, únemi anasynyń qasynda júretin", – dedi ol.
Ádemi Muqanǵalievanyń aitýynsha, qaiǵyly oqiǵadan keiin aiyptalýshynyń týystary marqumdardyń otbasyna kelip, kóńil aitpaǵan jáne keshirim suramaǵan.
"Qaiǵyly jaǵdaidan keiin bizge eshkim kelgen joq, keshirim de suramady. Sultannyń otbasymen asa aralaspaitynbyz, olar tuiyq adamdar edi", – dedi marqumnyń ápkesi.
Ol Aqbaiannyń qazirgi ýaqytta psihiatriialyq aýrýhanada jatqanyn aitty. Týystary onymen kezdesýge ruqsat ala almai júrgen kórinedi.
"Aqbaian qazir psihiatriialyq aýrýhanada. Bizge onymen kezdesýge ruqsat bermei otyr. Jaqynda meditsinalyq mekemeniń direktorynyń atyna kezdesýge ruqsat surap aryz jazdym. Qazir jaýap kútip otyrmyn", – dedi Ádemi Muqanǵalieva.
Sondai-aq ol Aqbaiannyń bes balasynyń qazirgi jaǵdaiyna da toqtaldy. Onyń sózinshe, balalardyń biri balalar úiinde, qalǵandary beiimdeý ortalyǵynda júr.
Marqumnyń ápkesi sottan ádildik kútetinin aitty. Ol aiyptalýshyǵa eń qatań jaza taǵaiyndalýy kerek dep esepteidi.
"Sottan ádildik kútemin. Ony ómir boiyna bas bostandyǵynan aiyrsa deimin. Bul ádil jaza bolady", – dedi Ádemi Muqanǵalieva.
