Burynǵy aýyl sharýashylyǵy ministri Asyljan Mamytbekov "Qasqa jol" baǵdarlamasynda elde et sharýashylyǵyna bailanysty qandai qiyndyqtar bar ekenin aitty, - dep habarlaidy Dalanews.kz.
Eks-sheneýnik áriptesteri qaǵaz kúiinde bárin jaqsy etip kórsetýge qumar ekenin jetkizdi.
"Statistika derekterine súiensek, mal basy keremet ósip jatyr. Ol derek degen qaǵazda ǵana, shyn mánindegi nárse, biz biletin jaǵdai: fermerlerdiń jaǵdaiy nasharlap jatyr. Olar maldyń sanyn ósirmek túgili, azaitýǵa áreket jasap jatyr.
Shyn mánindegi jaǵdaidy eshkim bilmeidi, bilgisi de kelmeidi. Qaǵazdaǵy ádemi derekter úlken basshylyqqa aparyp kórsetýge jaqsy. Eshkim jaman derekterdi aparǵysy kelmeidi.
Jaqsy derekterdi túzeýlep, "bári ósip jatyr, bári keremet" dep jaqsy kórinis kórip otyrmyz", - deidi ol.
Sonymen qatar, Mamytbekov Resei men Belarýsten keletin etke qatysty pikir bildirdi.
"Qyzyl ettiń importy óte shamaly, 10-15 myń tonnanyń ar jaq-ber jaǵy. Onyń ózi kóbine konservige, shujyqtarǵa ketip otyratyn etter.
Reseiden, Belarýsten ákelip jatyrmyz. Oǵan kóbine ózimiz kinálimiz.
Buryn Argentinadan, Aýstraliiadan kásipkerler steikke et alatyn. Meiramhana ustaityn kásipkerler. Bizdiń sala damyǵannan keiin importtyń ornyn qazaqstandyq ónimder basyp aldy", - dedi ol.
Eks-sheneýniktiń sózinshe, kezinde ushaqpen shetelden asyl tuqymdy mal ákeldi degen aqparat - qate.
"Men de, ministrlik te shetelden eshqandai siyr ákelgen joqpyz. Ony ákelgen - jeke kásipkerler. Kóbine siyr ákelindi. Analyq bas tólder ákelindi", - dedi Mamytbekov.
