بۇرىنعى اۋىل شارۋاشىلىعى ءمينيسترى اسىلجان مامىتبەكوۆ "قاسقا جول" باعدارلاماسىندا ەلدە ەت شارۋاشىلىعىنا بايلانىستى قانداي قيىندىقتار بار ەكەنىن ايتتى، - دەپ حابارلايدى Dalanews.kz.

ەكس-شەنەۋنىك ارىپتەستەرى قاعاز كۇيىندە ءبارىن جاقسى ەتىپ كورسەتۋگە قۇمار ەكەنىن جەتكىزدى.

"ستاتيستيكا دەرەكتەرىنە سۇيەنسەك، مال باسى كەرەمەت ءوسىپ جاتىر. ول دەرەك دەگەن قاعازدا عانا، شىن مانىندەگى نارسە، ءبىز بىلەتىن جاعداي: فەرمەرلەردىڭ جاعدايى ناشارلاپ جاتىر. ولار مالدىڭ سانىن وسىرمەك تۇگىلى، ازايتۋعا ارەكەت جاساپ جاتىر.

شىن مانىندەگى جاعدايدى ەشكىم بىلمەيدى، بىلگىسى دە كەلمەيدى. قاعازداعى ادەمى دەرەكتەر ۇلكەن باسشىلىققا اپارىپ كورسەتۋگە جاقسى. ەشكىم جامان دەرەكتەردى اپارعىسى كەلمەيدى.

جاقسى دەرەكتەردى تۇزەۋلەپ، "ءبارى ءوسىپ جاتىر، ءبارى كەرەمەت" دەپ جاقسى كورىنىس كورىپ وتىرمىز"، - دەيدى ول.

سونىمەن قاتار، مامىتبەكوۆ رەسەي مەن بەلارۋستەن كەلەتىن ەتكە قاتىستى پىكىر ءبىلدىردى.

"قىزىل ەتتىڭ يمپورتى وتە شامالى، 10-15 مىڭ توننانىڭ ار جاق-بەر جاعى. ونىڭ ءوزى كوبىنە كونسەرۆىگە، شۇجىقتارعا كەتىپ وتىراتىن ەتتەر.

رەسەيدەن، بەلارۋستەن اكەلىپ جاتىرمىز. وعان كوبىنە ءوزىمىز كىنالىمىز.

بۇرىن ارگەنتينادان، اۋستراليادان كاسىپكەرلەر ستەيككە ەت الاتىن. مەيرامحانا ۇستايتىن كاسىپكەرلەر. ءبىزدىڭ سالا دامىعاننان كەيىن يمپورتتىڭ ورنىن قازاقستاندىق ونىمدەر باسىپ الدى"، - دەدى ول.

ەكس-شەنەۋنىكتىڭ سوزىنشە، كەزىندە ۇشاقپەن شەتەلدەن اسىل تۇقىمدى مال اكەلدى دەگەن اقپارات - قاتە.

"مەن دە، مينيسترلىك تە شەتەلدەن ەشقانداي سيىر اكەلگەن جوقپىز. ونى اكەلگەن - جەكە كاسىپكەرلەر. كوبىنە سيىر اكەلىندى. انالىق باس تولدەر اكەلىندى"، - دەدى مامىتبەكوۆ.