Shymkentte jeti balanyń anasy burynǵy kúieýi turatyn úidiń aýlasynan óli kúiinde tabyldy. Marqumnyń qyzdary qaiǵyly jaǵdaiǵa týǵan ákelerin kinalap otyr. Sózderinshe atpaldai azamat 42 jastaǵy áieldi soqqyǵa jyǵyp, úshinshi qabattan laqtyryp jibergen, dep habarlaidy Dalanews.kz 31 arnananyń “Informbiýro” jańalyqtar qyzmetine silteme jasap.
Bul sumdyqtyń bárine kámelet jasyna tolmaǵan eki balasy kýá bolǵan deidi qara jamylǵan otbasy músheleri. Qazir politsiia kúdiktini qamaýǵa alyp, tergep jatyr. Ara-tura dombyrany kúmbirletip, áýeletip án aitatyn Sholpan Aqmyrzanyń úii qazir kúńirenip tur. Beibit kúnde jeti birdei bala jetim qaldy. Jaqyndaryn joqtaǵan jandardaryna qiyn. Dám-tuzy 42 jasynda úzilgen kelinshektiń qazasyna týystary burynǵy kúieýin kinálaidy.
"Men ózi ólgenine senbeimin. Úshinshi etajdan sekirgenniń ózinde de ondai jaraqattar bolmaidy. Inimniń aityp turǵan sózine men senemin. Urǵan, súiregen, terezeden laqtyryp jibergen deidi. Odan aldyn da bizde kúnde urys-keris bolatyn. Anam 2020-da zańdy túrde ajyrassa da adresimizdi bilip kúnde tyqyldatyp turyp kiretin", deidi marqumnyń qyzy Perizat Qaldarbek.
Týystarynyń aitýynsha, kópbalaly ana ajyrasqan kúieýimen tatýlasyp, úiine barypty. Arada bir kún ótkende qaraly habar jetken dep otyr. Iaǵni, áiel úshinshi qabattan sekirip, óz-ózine qol jumsaǵan kórinedi. Alaida marqumnyń jaqyndary buǵan senbeidi. Sebebi, kámelet jasyna tolmaǵan balalary bolǵan jaitty aityp bergen.
"Tórt jasar balasy aityp otyr. Gantelmen basyn uryp-uryp qulady. Odan keiin qashyp bara jatqanda tizesinen taǵy gantelmen urdy. Myna qashqan aiaǵyń ba dep. Qulaǵan adamǵa uqsamaidy. Ábden bilgenin istep, uryp-uryp, denesine otvertka tyqqan, pyshaq tyqqan denesiniń bárin kógala qoidai qylyp tastaǵan", deidi marqumnyń ápkesi Aqmaral Aqmyrza.
Politsiia ózin-ózi óltirýge deiin jetkizý babymen is qozǵap, 47 jastaǵy kúdiktini qamaýǵa aldyq dep qysqa qaiyrdy.
"Áieldiń ólim jaity boiynsha politsiiamen qylmystyq is tirkelgen. Qazirgi tańda osy jaittyń barlyq mán-jaiyn anyqtaýǵa baǵyttalǵan tergeý is-sharalary júrgizilýde. Sot-meditsinalyq saraptamasy taǵaiyndaldy. Kúdikti qamaýda otyr", deidi Shymkent PD ókilderi.
Biraq qara jamylǵan otbasy is "adam óltirý" babymen tergelsin dep otyr. Sholpan Aqmyrza joldasymen 22 jyl birge turǵan eken. Biraq erli-zaiyptylar túsinise almai, tórt jyl buryn eki jaqqa ketken. Jaldamaly páterde turǵan áiel saýda jasap, nápaqa tapqan deidi aǵaiyn-týysy. Marqumnyń úlkeni 22-de, kishisi 2 jasta eken.
