3 naýryzda prokýrorlar Áblázovqa, J.Jarymbetovqa, K.Sadyqovqa jáne S.Mámeshke qatysty aıyptaý aktisin bekitti. Aıyptaý aktileri qylmystyq prosestiń barlyq qatysýshysyna, sonyń ishinde Muhtar Áblázovtiń qorǵaýshysyna berilgen. "M.Áblázovtiń ózi Qazaqstan Respýblıkasynan tys jerde jáne shaqyrtýdan jaltarǵan, osyǵan baılanysty prokýratýra osy habarlamany qylmystyq istiń sotqa joldanǵanyn jarıalaıdy", – delingen prokýratýra relızinde.
Osyǵan deıin Muhtar Áblázov pen onyń Qazaqstandaǵy sybaılastaryna qatysty sotaldy tergeý aıaqtalǵany habarlanǵan edi. "Aldyn ala tergeý jan-jaqty, tolyq ári ádil ótti, dáleldeýge jatatyn barlyq jaǵdaı anyqtaldy", – delingen edi Sybaılas jemqorlyqqa qarsy is-qımyl ulttyq búrosynyń baspasóz qyzmetiniń habarlamasynda.
Aıta keteıik, Áblázovqa qylmystyq top quryp, oǵan basshylyq etti, BTA Bankiniń qarajatyn jymqyrdy jáne jekeshelendirdi, bank qarajatyn zańsyz qoldandy jáne qyzmettik ókilin asyra paıdalandy degen kúdik kelip otyr. Jalpy shyǵyn somasy – 7,5 mıllıard AQSH dollary.
"Tergeýden jymqyrylǵan qarajattyń halyqtyń zeınetaqy jınaǵy ekeni, Qazaqstan azamattarynyń jeke jınaǵy ekeni jáne sheteldik qarjy ınstıtýttarynyń qaryzy ekeni naqtyly anyqtaldy", - delingen Ulttyq búronyń habarlamasynda.
Sonymen birge, habarlamada BTA Bankiniń qaryzyn óteý boıynsha mindetti memlekettiń óz moınyna alǵany aıtylǵan. Eske sala keteıik, 2017 jyldyń 2 aqpanynda QR Sybaılas jemqorlyqqa qarsy is-qımyl ulttyq búrosy jaýap alý úshin Muhtar Áblázovti Astanaǵa shaqyrǵan bolatyn. "QR Sybaılas jemqorlyqqa qarsy is-qımyl ulttyq búrosy "BTA Bank" AQ burynǵy top-menedjmenti M.Q.Áblázovqa, J.D.Jarymbetovke jáne ózgelerge qatysty qylmystyq istiń sotaldy tergeýin jalǵastyryp jatyr.
Tergeý barysynda Antıkorrýpsıa qyzmeti Áblázov pen onyń sybaılastarynyń zańsyz áreketteriniń qosymsha dálelderin tapty. Bankten qarajatty jymqyrýdyń jańa nusqalary ashyldy. Anyqtalǵan derekter Áblázovtiń qylmystyq uıym quryp, oǵan basshylyq etken degen qosymsha kúdik kelip otyr. Onyń ishinde birqatar uıymdasqan qylmystyq top kiredi, top Qazaqstan terıtorıasynda da, shetelde de áreket etken", – delingen edi vedomstvo habarlamasynda.
