3 ناۋرىزدا پروكۋرورلار ءابليازوۆقا، ج.جارىمبەتوۆقا، ك.سادىقوۆقا جانە س.مامەشكە قاتىستى ايىپتاۋ اكتىسىن بەكىتتى. ايىپتاۋ اكتىلەرى قىلمىستىق پروسەستىڭ بارلىق قاتىسۋشىسىنا، سونىڭ ىشىندە مۇحتار ءابليازوۆتىڭ قورعاۋشىسىنا بەرىلگەن. "م.ءابليازوۆتىڭ ءوزى قازاقستان رەسپۋبليكاسىنان تىس جەردە جانە شاقىرتۋدان جالتارعان، وسىعان بايلانىستى پروكۋراتۋرا وسى حابارلامانى قىلمىستىق ءىستىڭ سوتقا جولدانعانىن جاريالايدى"، – دەلىنگەن پروكۋراتۋرا رەليزىندە.
وسىعان دەيىن مۇحتار ءابليازوۆ پەن ونىڭ قازاقستانداعى سىبايلاستارىنا قاتىستى سوتالدى تەرگەۋ اياقتالعانى حابارلانعان ەدى. "الدىن الا تەرگەۋ جان-جاقتى، تولىق ءارى ءادىل ءوتتى، دالەلدەۋگە جاتاتىن بارلىق جاعداي انىقتالدى"، – دەلىنگەن ەدى سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ باسپا ءسوز قىزمەتىنىڭ حابارلاماسىندا.
ايتا كەتەيىك، ءابليازوۆقا قىلمىستىق توپ قۇرىپ، وعان باسشىلىق ەتتى، بتا بانكىنىڭ قاراجاتىن جىمقىردى جانە جەكەشەلەندىردى، بانك قاراجاتىن زاڭسىز قولداندى جانە قىزمەتتىك وكىلىن اسىرا پايدالاندى دەگەن كۇدىك كەلىپ وتىر. جالپى شىعىن سوماسى – 7،5 ميلليارد اقش دوللارى.
"تەرگەۋدەن جىمقىرىلعان قاراجاتتىڭ حالىقتىڭ زەينەتاقى جيناعى ەكەنى، قازاقستان ازاماتتارىنىڭ جەكە جيناعى ەكەنى جانە شەتەلدىك قارجى ينستيتۋتتارىنىڭ قارىزى ەكەنى ناقتىلى انىقتالدى"، - دەلىنگەن ۇلتتىق بيۋرونىڭ حابارلاماسىندا.
سونىمەن بىرگە، حابارلامادا بتا بانكىنىڭ قارىزىن وتەۋ بويىنشا مىندەتتى مەملەكەتتىڭ ءوز موينىنا العانى ايتىلعان. ەسكە سالا كەتەيىك، 2017 جىلدىڭ 2 اقپانىندا ق ر سىبايلاس جەمقورلىققا قارسى ءىس-قيمىل ۇلتتىق بيۋروسى جاۋاپ الۋ ءۇشىن مۇحتار ءابليازوۆتى استاناعا شاقىرعان بولاتىن. "ق ر سىبايلاس جەمقورلىققا قارسى ءىس-قيمىل ۇلتتىق بيۋروسى "بتا بانك" اق بۇرىنعى توپ-مەنەدجمەنتى م.ق.ءابليازوۆقا، ج.د.جارىمبەتوۆكە جانە وزگەلەرگە قاتىستى قىلمىستىق ءىستىڭ سوتالدى تەرگەۋىن جالعاستىرىپ جاتىر.
تەرگەۋ بارىسىندا انتيكوررۋپسيا قىزمەتى ءابليازوۆ پەن ونىڭ سىبايلاستارىنىڭ زاڭسىز ارەكەتتەرىنىڭ قوسىمشا دالەلدەرىن تاپتى. بانكتەن قاراجاتتى جىمقىرۋدىڭ جاڭا نۇسقالارى اشىلدى. انىقتالعان دەرەكتەر ءابليازوۆتىڭ قىلمىستىق ۇيىم قۇرىپ، وعان باسشىلىق ەتكەن دەگەن قوسىمشا كۇدىك كەلىپ وتىر. ونىڭ ىشىندە ءبىرقاتار ۇيىمداسقان قىلمىستىق توپ كىرەدى، توپ قازاقستان تەرريتورياسىندا دا، شەتەلدە دە ارەكەت ەتكەن"، – دەلىنگەن ەدى ۆەدومستۆو حابارلاماسىندا.
