Abaı Qunanbaıulynyń úıin kórsetemin dep synǵa qalǵan jýrnalıs Álıa Áshim qazaqstandyqtardan keshirim surady, dep habarlaıdy Dalanews.kz.
Jýrnalıs Qarqaralydaǵy vıdeo ábes bolǵanyn atap ótti.
"Sizder - ákem, aǵa-ápkelerimmen qatar qaýym úshin “Abaıdy qorlaǵan qyz” degen “ataqpen” qalamyn dep esh oılamappyn. Feısbýkte sırek otyramyn, biraq kesheli-beri ózim syılaıtyn, boı túzeıtin keı azamattardyń postyn oqyp júregim aýyryp otyrǵany... Osynda taraǵan Qarqaralydaǵy vıdeonyń ábes bolǵanyn moıyndaımyn. Ony aýyldaǵy ákem de renjip, eskertti. Sondyqtan tabalaý emes, janashyrlyqpen, oryndy syn aıtqan aǵa-ápkelerimnen keshirim suraımyn", - deıdi jýrnalıs.
Álıa Áshim orynsyz synaǵandar da bolǵanyn aıtty.
"Bir aıtqym keletini - "Abaıdy qorlaý maqsatynda”, “qaralym úshin”, “toptar qarjylandyrady” degen keı pikirlermen kelise almaımyn. Shyn máninde, biz - qazaqtyń mádenıetin, tarıhyn barynsha nasıhattaýǵa tyrysyp júrgen komandamyz (ózim solaı dep úmittenemin, áriptester aıtsyn).
AQSH-qa oqýǵa ketpes buryn qazaqsha kontent, tarıhı derekti fılmder úshin biraz bıznes ókilderiniń esigin qaǵyp, seriktestik usynatyn edik. Qanshama prezentasıa, pıchıń óttik. Qoldaǵandar birli-jarym boldy. Keıin elge oralǵan soń, úkimetten, eshbir toptan aqsha almaı, taza qazaq kontentin kommersıalızasıalaýǵa barymyzdy saldyq. Qazirgi tańda Freedom Holding Corp., Bi Group, Aviasales, Sandyq Group, Halyq Bank ispetti irili-usaq biraz kompanıalardyń jarnamalyq materıaldaryn jasap, odan túsken qarjyny tutas aǵartýshylyq jobalarǵa salyp júrmiz. (aǵartýshylyq jobalarǵa esh uıymnyń yqpaly joq). Osy kúnge deıin (taza óz qarjymyzǵa) “Qonaev dáýiri”, “Biz nege oryssha sóıleımiz?”, “Jeltoqsan” derekti fılmderin túsirdik. Keıin dál osy taqyryptardy áleýmettik jelide (TikTok, Instagram) barynsha jastar qyzyǵatyndaı formada berip keldik", - deıdi ol.
Jýrnalısiń sózinshe, keı toptar qarjylandyrady dep bólisken vıdeodaǵy "quıryq-baýyr" týraly aqparat “Salt-dástúr sóıleıdi” kitabynan alynǵan.
"Vıdeonyń astynda silteme de bolǵan edi. Eshkimniń lobbıinsiz, sol aqparat negizinde jasaldy. Al Talǵat Rysqulbekovpen foto - bizdiń bolashaq jobamyzǵa qatysty suqbat barysynda túsirildi. “Jeltoqsan” derekti fılminen keıin sol kezde sottalǵan barlyq aǵa-ápkelerden suqbat jazyp qalýdy maqsat tuttyq. Óz qarjymyzǵa, Qazaqstannyń barlyq aýmaǵyn aralap, osy kúnge deıin “Jeltoqsan oqıǵasy” kezinde sottalǵan 103 adamnyń 40-nan suqbat jazdyq. Áli de osyndaı shamada suqbat jazylady. Bul - tarıhı jadty saqtaý, aǵa-ápkelerdiń kózi ótip ketpeı turǵanda atqarýymyz qajet mısıa dep iske kiriskenbiz", - deıdi Álıa.
Ol Abaıdy mazaq etý, qazaqtyń mádenıet, tarıhyn qorlaý deıtin nıetim eshqashan bolmaǵanyn aıtty.
"Kerisinshe, tarıhı jadty qalpyna keltirý, sananyń dekolonızasıasy, ótkenge jańa refleksıa jasaýǵa nıettenip, jastarǵa jobalar jasap kelemiz. Áli jasaımyz da. YouTube-te barlyq jobalarymyzben tanysa alasyzdar. Nıetimdi jetkize aldym dep senemin. Qoldaýlaryńyz, oryndy syndaryńyz úshin raqmet!", - deıdi jýrnalıs.
