Abai oblysynyń ákimi Berik Ýáli maýsymnyń 19-20 kúnderi Semei qalasynda ótetin «Týǵan jerge týyńdy tik» atty investitsiialyq forýmǵa qatysýǵa shaqyrdy. Bul bastama – týǵan jerdi damytýǵa úles qosýǵa nietti jerlesterdiń basyn qosatyn mańyzdy alań bolmaq, – dep habarlaidy Dalanews.kz
Forýmnyń negizgi maqsaty – Abai oblysynyń áleýmettik-ekonomikalyq áleýetin arttyrý, jańa investitsiialyq jobalardy iske asyrý jáne otansúigishtik rýhyn kúsheitý. Aimaq basshysy Berik Ýálidiń aitýynsha, forým týǵan topyraqqa qurmetin bildirgisi keletin árbir azamat úshin taptyrmas múmkindik.
«Sizder sondai qasietti topyraqta týyp, qasterli mekende túlegenderińizdi umytpańyzdar. El men jerge janashyrlyq tanytyp júrgen azamattar az emes. Bul – naǵyz otansúigishtiktiń, elge adaldyqtyń jarqyn kórinisi. Aldymyzda turǵan mańyzdy mindetterimizdiń biri – óńirdiń áleýetin kóterý. Osy jolda birge eńbek eteiik», – dedi Berik Ýáli.
Forým aiasynda Semei qalasynda 75 myń adamǵa arnalǵan jańa yqshamaýdan salý jobasy tanystyrylady. Bul aýdanda turǵyn úilermen qatar, jastar saraiy, sport jáne mádeniet nysandary, ǵylymi ortalyqtar men investorlarǵa arnalǵan keńseler boi kótermek.
Sondai-aq, Memleket basshysy Qasym-Jomart Toqaevtyń bastamasymen qolǵa alynǵan «Abaiǵa qurmet» aktsiiasy aiasynda elimizdiń túrli óńirleri Abai oblysynda áleýmettik nysandar salýǵa kiristi.
Berik Ýáli forým aiasynda sheteldik jáne otandyq investorlarmen yntymaqtastyq ornatýǵa erekshe mán beriletinin atap ótti.
«Bul tek forým emes, týǵan jerge taǵzym etýdiń, el bolashaǵyna baǵyttalǵan igi isterdi birlese bastaýǵa múmkindik. Týǵan jerge týyńdy tik, aǵaiyn!», – dedi óńir basshysy.
