Oblys ákimdigi habarlaǵandai, aldaǵy jylytý maýsymyna oblystyń kómirge degen jalpy suranysy 1,245 mln tonnany quraidy. Onyń ishinde halyqqa – 567,9 myń tonna, ortalyqtandyrylǵan jylý kózderine – 595,4 myń tonna, biýdjettik uiymdarǵa – 84,5 myń tonna kómir qajet.
Óńirdiń kommýnaldyq sektoryn kómirmen ýaqtyly qamtamasyz etý úshin «Qarajyra» AQ jáne Qazaqstan temir joly kompaniiasymen birlesip, kómir shahtalarynan kómirdi ýaqytyly tieý úshin vagondardy jetkizý kestesi ázirlengen.
Búgingi tańda oblystyń temirjol tuiyqtarynda 13,3 myń tonna kómir bar, onyń ishinde Semeide – 9 myń tonna, Aiagóz aýdanynda – 3,4 myń tonna, Jarma aýdanynda – 200 tonna, Borodýliha aýdanynda – 660 tonna.
– Kómir saýdasyndaǵy kezekter men baǵany qoldan kóterýge jol bermeý úshin turǵyndardan kún sýyǵansha kómir satyp alýlaryn suraimyz. Bul rette kómirdi saýdalaý isi básekelestik ortanyń quzyrynda ekenin umytpaýymyz kerek. Onda taýarlardyń baǵasyn retteý men baqylaýdy osy saladaǵy ýákiletti organ júzege asyrady, – dedi Abai oblysy ákimdiginiń Energetika jáne turǵyn úi-kommýnaldyq sharýashylyq basqarmasynyń basshysy Altynbek Ádilbekov.
Ákimdik qazirgi tańda kómir kelip túsetin temirjol tuiyqtarynda dúrligis joq ekenin alǵa tartty. Kómir jetkizý suranys pen josparǵa sáikes júrgizilip jatqanyn atap ótti.
