Abaı oblysynda prokýratýra 80 qaıtalama buzýshylyqty anyqtady, dep habarlaıdy Dalanews.kz.
Abaı oblysynyń tabıǵat qorǵaý prokýratýrasy qaldyqtardy joıý jáne zańsyz qoqys úıindilerin joıý máseleleri boıynsha ekologıalyq zańnamanyń talaptarynyń saqtalýyn taldaý júrgizdi.
2023 jyly oblys aýmaǵynda 347 zańsyz qoqys úıindisi tirkelgen, olardyń joıylǵany týraly jergilikti atqarýshy organdar esep bergeni anyqtaldy.
Alaıda, 2024 jyldyń sońynda 233 jańa qoqys úıindisi anyqtaldy. Onyń 80-niń koordınattary 2023 jyly tirkelgen qoqys úıindileriniń ornalasýymen sáıkes keledi. Bul jergilikti atqarýshy organdardyń osy máselege formaldy qarap, qabyldanǵan sharalardyń tıimdiliginiń jetkiliksizdigin kórsetedi.
Anyqtalǵan buzýshylyqtar boıynsha prokýrorlyq qadaǵalaý aktisi engizildi. Aıagóz, Borodýlıha, Jarma jáne Besqaraǵaı aýdandarynyń ákim orynbasarlary, sondaı-aq Semeı qalasynyń turǵyn úı-komýnaldyq sharýashylyǵy bólimi basshysy ákimshilik jaýapkershilikke tartyldy.
