اباي وبلىسىندا پروكۋراتۋرا 80 قايتالاما بۇزۋشىلىقتى انىقتادى، دەپ حابارلايدى Dalanews.kz.
اباي وبلىسىنىڭ تابيعات قورعاۋ پروكۋراتۋراسى قالدىقتاردى جويۋ جانە زاڭسىز قوقىس ۇيىندىلەرىن جويۋ ماسەلەلەرى بويىنشا ەكولوگيالىق زاڭنامانىڭ تالاپتارىنىڭ ساقتالۋىن تالداۋ جۇرگىزدى.
2023 جىلى وبلىس اۋماعىندا 347 زاڭسىز قوقىس ءۇيىندىسى تىركەلگەن، ولاردىڭ جويىلعانى تۋرالى جەرگىلىكتى اتقارۋشى ورگاندار ەسەپ بەرگەنى انىقتالدى.
الايدا، 2024 جىلدىڭ سوڭىندا 233 جاڭا قوقىس ءۇيىندىسى انىقتالدى. ونىڭ 80-ءنىڭ كوورديناتتارى 2023 جىلى تىركەلگەن قوقىس ۇيىندىلەرىنىڭ ورنالاسۋىمەن سايكەس كەلەدى. بۇل جەرگىلىكتى اتقارۋشى ورگانداردىڭ وسى ماسەلەگە فورمالدى قاراپ، قابىلدانعان شارالاردىڭ تيىمدىلىگىنىڭ جەتكىلىكسىزدىگىن كورسەتەدى.
انىقتالعان بۇزۋشىلىقتار بويىنشا پروكۋرورلىق قاداعالاۋ اكتىسى ەنگىزىلدى. اياگوز، بورودۋليحا، جارما جانە بەسقاراعاي اۋداندارىنىڭ اكىم ورىنباسارلارى، سونداي-اق سەمەي قالاسىنىڭ تۇرعىن ءۇي-كوممۋنالدىق شارۋاشىلىعى ءبولىمى باسشىسى اكىمشىلىك جاۋاپكەرشىلىككە تارتىلدى.
