Asqaq ónerdiń atasy Abai atyndaǵy Qazaq ulttyq opera jáne balet teatry óziniń 90-shy maýsymyn tarih betine órnektedi. Mereili jyldar boiy ómirin kieli sahnaǵa, shyǵarmashylyqqa, teatrǵa qyzmet etýge arnaǵan 126 adal janǵa mádeni oshaq arnaiy tósbelgi men syilyq tabystady.
Qos mereitoiy – qara shańyraqtyń 90 jyldyǵy men Ahmet Jubanov-Latif Hamididiń «Abai» operalyq spektakliniń 80 jyldyǵy tuspa-tus kelgen maýsym, esten ketpes mereke syilady. Jaqsynyń jaqsylyǵy atalyp, qýanyshtan kóńil tasyǵan maýsymasharda teatr ujymy aqsaqaldaryna qyzyl kilem tósep, qoshemetpen qarsy aldy. Marapattalǵan ardagerler on jyldan astam ýaqyt boiy qara shańyraqta úzdiksiz eńbek etken mamandar. Olardyń qatarynda tek sahna ártisteri ǵana emes, kostiým tsehy, grim mamany, jaryq qoiýshy siiaqty teatrdyń barlyq bóliminiń burynǵy qyzmetkerleri bar.
Qurmetti qonaqtar qatarynan ultymyzdyń mańdaiyna bitken jaryq juldyzdary KSRO Halyq ártisi jáne Memlekettik syilyq iegeri Bibigúl Tólegenova, Qazaq KSR Halyq ártisi jáne Qazaq KSR Memlekettik syilyǵynyń iegeri Raýshan Baiseiitova, Qazaqstan jáne Tatarstan Halyq ártisi Nurjamal Úsenbaeva jáne basqa opera men balet maitalmandary, Qazaqstandaǵy diplomatiialyq elshilikterdiń qadirli ókilderi tabyldy.
- Abai atyndaǵy teatr «Ǵasyr aldyndaǵy jańa beleske» aiaq basty. Áne-mine degenshe, aldaǵy 10 jylda qara shańyraǵymyz júz jasaidy. Osymen 90 jylǵa núkte qoiylatyn tarihi kúnde ardagerlerdiń basyn qosyp, eńbegine raqmet aityp laiyqty qurmet kórsetý, búgingi óskeleń urpaqtyń, óner ujymynyń birden-bir paryzy dep esepteimin. Nege deseńiz, adam eńbegi birinshi kezekte uiym tarapynan, odan ary qarai qoǵam, memleket tarapynan baǵalanyp turǵany mańyzdy. Bul ásirese óner adamyna shabyttaný úshin asa qajet, sondyqtan Abai atyndaǵy teatrda jańa úrdis – óz qyzmetkerleriniń eńbegin jylda atap ótetin ádemi dástúr jol tartty, - dedi Abai atyndaǵy QazUOBT direktory Ainur Kópbasarova.
Teatr ardagerlerin marapattaý saltanatynda asyldyń tuiaǵy Raýshan Hatiiatqyzy anasynyń asa baǵaly portreti men kezinde Kúlásh Baiseiitovanyń spektaklderde kigen birneshe bas kiimin óner ordasynyń murajaiyna syilady. Qazaq KSR Eńbek sińirgen óner qairatkeri Nikolai Tsivchinskii salǵan sýret buryn-sońdy esh jerde jariialanbaǵan jáne onyń erekshe tarihy bar.
Maýsymasharda qonaqtarǵa shaǵyn mýzykalyq tartý jasalyp, merekeli kesh Ahmet Jubanov-Latif Hamididiń «Abai» operasyn tamashalaýmen támamdaldy.
Abai atyndaǵy Qazaq ulttyq opera jáne balet teatry osylaisha óziniń «Ǵasyr aldyndaǵy jańa belesin» – 91-shi maýsymyn bastap ketti. Dástúrge sai jańa maýsymnyń ekinshi kúninde P. Chaikovskiidiń «Aqqý kóli» balettik spektakli kórermenine jol tartty.
