Abai oblysynda qazaqtyń uly aqyny, oishyl Abai Qunanbaiulynyń týǵanyna 180 jyl tolýyna arnalǵan saltanatty is-shara ótti. Mereitoi barysynda Qazaqstan Prezidenti Qasym-Jomart Toqaevtyń quttyqtaý hatyn Senat Tóraǵasy Máýlen Áshimbaev oqyp berdi,- dep habarlaidy Dalanews.kz
Memleket basshysynyń quttyqtaýynda Abai álemdik aýqymdaǵy ǵulama ekenine jáne onyń rýhani murasy keler urpaq úshin de ózekti bolyp qala beretinine basa mán berilgen.
«Abai – tól mádenietimizdi damytýǵa ólsheýsiz úles qosqan álemdik deńgeidegi kemeńger tulǵa, halqymyzdyń sana-sezimin jańǵyrtqan uly aqyn. Ol jańa ádebietimizdiń negizin qalap, dúnietamymyzdyń kókjiegin keńeitti. Óskeleń urpaqty bilimpaz, eńbekqor, adal azamat bolýǵa shaqyryp, ulttyń jańa sapasyn qalyptastyratyn qasietterdi keńinen dáriptedi. Otanǵa degen súiispenshiliktiń jáne el múddesi úshin qaltqysyz qyzmet etýdiń ozyq úlgisin kórsetti. Hákim Abaidyń mol murasy – qazaq halqynyń ǵana emes, barsha adamzattyń ónege alatyn asyl qazynasy. Onyń oi-tolǵamdary men ósietteriniń ózektiligi eshqashan joǵalmaidy. Sondyqtan Abaidy taný jáne tanytý, shyǵarmashylyǵyn tereń zerdeleý óte mańyzdy», – delingen Prezidenttiń quttyqtaý hatynda.
Senat Tóraǵasy Máýlen Áshimbaev óz sózinde keiingi jyldarda Memleket basshysynyń bastamasymen Abai murasy elimizde ǵana emes, álemdik deńgeide de keńinen nasihattalyp jatqanyn aitty. Uly oishyldyń 180 jyldyq mereitoiy – búkil el úshin mańyzdy rýhani oqiǵa. Bul aýqymdy is-shara halqymyzdyń parasat biigine, adamgershilik qundylyqtarǵa jáne ulttyq biregeilikke degen umtylysynyń jarqyn kórinisi ekeni anyq.
«Prezidentimiz Qasym-Jomart Kemeluly Toqaev uly oishyldy jan-jaqty ulyqtaýǵa únemi basa mán berip keledi. Sońǵy jyldarda Abai murasyn keńinen dáripteý úshin kóptegen jumys atqaryldy. Memleket basshysynyń bastamasymen resmi túrde 10 tamyz – Abai kúni bolyp bekitildi. Abai shyǵarmalary álemniń negizgi tilderine aýdaryldy. Osy rette Prezidentimizdiń tapsyrmasymen Almatyda Abai ulttyq mektebi boi kóterip jatqanyn da atap ótken jón. Bul biregei bilim ordasy qazaq ziialylarynyń jańa býynyn qalyptastyrýǵa qyzmet etpek. Sondai-aq uly oishyl bizge «Tolyq adam» tujyrymdamasyn ósiet etti. Qazirgi tańda Abaidyń bul ideiasy memlekettik saiasatymyzdyń negizgi ózegine ainalyp otyr. Memleket basshysy jariialaǵan «Adal azamat» tujyrymdamasy osy negizge taban tireidi. Prezidentimiz «Ulttyq quryltaida» belgilep bergen ozyq oily ultqa tán qasietter de ǵulamanyń ósietterimen úndes. Osyndai is-sharalardy Abaiǵa taǵzym etý ǵana emes, onyń oilaryn zamanaýi turǵyda jańasha túsinip, ómirde júzege asyrýǵa jańa múmkindik dep qabyldaimyz», – dedi Máýlen Áshimbaev.
Sonymen qatar Palata Spikeri mereili data aiasynda halyqaralyq, respýblikalyq jáne óńirlik deńgeide 100-den astam aýqymdy is-shara ótkizilip jatqanyn tilge tiek etti. Olardyń qatarynda aitys, ulttyq óner festivali jáne taǵy basqa irgeli jobalar bar. Abai murasyna arnalǵan «ABAY ACADEMIYASY» alǵashqy entsiklopediialyq portaly iske qosylyp, Semeide inkliýzivti kitaphana da ashyldy. Bul aqyn ónegesin barlyq sanatta dáripteý jolyndaǵy mańyzdy qadam ekeni sózsiz.
Senat Tóraǵasy óńirge sapary barysynda Abai men Shákárimniń kesenelerin ziiarat etip, Qaraýyl aýylynda aqyn eskertkishine gúl shoǵyn qoidy.
Oishyldyń mereitoiy Abai oblysynda ulttyq deńgeidegi mádeni oqiǵaǵa ainalyp, oǵan 15 elden kelgen delegatsiia ókilderi, ziialy qaýym, jastar men qoǵam qairatkerleri, barlyǵy 30 myńnan astam adam qatysty.
