"Ázir biz respýblıkalyq komýnıkasıalar ortalyǵynan habar taratyp otyrmyz. Osynaý ortalyq tótenshe jaǵdaı kezinde halyqty qajetti aqparatpen qulaqtandyrý úshin Prezıdent tapsyrmasy boıynsha ashyldy.
Ortalyq 3 baǵyt boıynsha jumys júrgizedi. Atap aıtar bolsam - jalǵan, arandatý maqsatyndaǵy aqparatty taýyp, ony teriske shyǵarý; tótenshe jaǵdaı kezindegi mem.organdardyń aqparattyq jumysyn úılestirý jáne Coronavirus2020.kz saıtynyń jumysyn júrgizý", – dedi Abaev.
Mınıstrdiń aıtýynsha Prezıdent Toqaev toqtalyp ótken daǵdarysqa qarsy sharalardyń aýqymy keń.
"Prezıdent málimdemesi Qazaqstan halqynyń qoldaýyn tapqany anyq. Ózderińiz de estińizder, Úkimet muhtaj azamattardyń barlyǵyna qol ushyn sozady. Eshkim umyt qalmaıdy. Toqaev sóziniń túıini osy.
Ázir bizdiń ortalyqqa BAQ ókilderi men qarapaıym azamattardan kelip jatqan saýaldyń basym bóligi Memleket basshysynyń tapsyrmalary qalaı júzege asaryna qatysty.
Osyǵan oraı búgin Úkimet basshysynyń tóraǵalyǵymen jıyn ótti. Prezıdent tapsyrmasyn oryndaý maqsatynda mınıstrler men barlyq deńgeıdegi ákimder Jol kartalaryn ázirleıdi. Alaıda ázir oǵan ýaqyt kerek. Buǵan túsiniktikpen qarap, kómektiń naqty tetikteriniń jarıalanýyn kútýdi suraımyz", – dedi mınıstr.
Abaev Toqaev tapsyrmasynyń barlyq tarmaǵy oryndalaryn basa aıtty.
"Aıtalyq ázir kópshilik qaýymnan "Tabysynan aıyrylǵan turǵyndarǵa tólemdi qalaı alýǵa bolady?", "Buǵan qandaı qujat qajet?" degen sekildi saýal kelip túsýde. Úkimet munyń bárin úılestirip, el nazaryna usynady.
İlgeride aıtqanymdaı eshkim qaraýsyz, kómeksiz qalmaıdy. Tólemder kimge tıesili bolsa, sol azamattardyń barlyǵy alady. Alý tártibin aldaǵy ýaqytta habarlaımyz», – dedi Dáýren Abaev.
...
Mınıstr "barsha Qazaqstan turǵyndaryna aqsha taratyp berý kerek" degen keıbir qoǵam belsendileriniń pikirimen kelispeıdi.
"Memleket daǵdarysqa qarsy 10 mlrd dollar bóldi. Qazaqstandaǵy halyq sanyna shaqqanda bul qomaqty qarajat.
Al keıbir azamattardyń halyqqa bir rettik tólem tóleý syndy usynysynan bas tarttyq. Munyń bári popýlızm. Álbette mundaı ıdeıa el arasyna tez tarap ketedi. Biraq onyń tıimdiligi qysqa merzimdi ekenin eshkim qaperine almaıdy.
Qysqa merzimdi bolǵasyn nátıjesi de nólge teń. Toqaev tapsyrmasyn saı elimizde iskerlik belsendilikke túrtki bolatyn shara qabyldaý qajet. Mundaı jaǵdaıda bıznesti nyǵaıtý, jumys oryndaryn qurýǵa basymdyq berý mańyzdy.
Dál qazir bizdiń maqsat - eldegi dúkender sóresinde qazaqstandyq ónimniń úlesin arttyrý", – dedi Abaev.
Onyń pikirinshe Qazaqstan bul daǵdarystan sabaq alyp, munaıǵa táýeldilikten arylýǵa kúsh salýy kerek. Onyń birden-bir joly shaǵyn jáne orta bızneske qoldaý kórsetý.
"Buǵan dálel bıznesti nesıeleý 1 trln teńgege deıin ulǵaıtyldy. Sońǵy mólsherleme 6 paıyz bolady. "Qarapaıym hattar ekonomıkasy" baǵdarlamasynda basymdyqqa ıe taýarlar tizimi keńeıtiledi.
Mıkro jáne shaǵyn bıznes úshin kredıt mólsheri 360 mln teńgege deıin artady. Salyq jeńildigi jasalady. Tekserý azaıady.
Importty óz ónimderimizben almastyrý úshin ázirgi kúni 1 trln teńge somaǵa 258 joba iriktelinip alyndy. Osynyń nátıjesinde 25 myń jumys orny qurylady», - dedi ol.
...
Tikeleı efır barysynda mınıstr aldaǵy kúnderi Almatyǵa koronavırýsty anyqtaıtyn testter jetkiziletinin aıtty.
"27 naýryzda Almaty qalasyna 266 myń test alyp keledi. Olar eń aldymen dárigerler qolyna tıedi. Bulardyń barlyǵy tegin testiler», - dedi Abaev.
Onyń atap ótýinshe, osy ýaqytqa deıin elimizde koronavırýs ınfeksıasyn anyqtaýǵa arnalǵan 15 myńnan astam test jasalǵan. Ázirgi tańda táýligine myńnan astam test jasalýda. Osy jumys aldaǵy ýaqytta da jalǵasady.
"Keshe bas sanıtarlyq dárigerdiń qaýlysy shyqty. Oǵan sáıkes barlyq qalaǵa kelýshilerdiń túgeline test júrgiziletin bolady", - dedi mınıstr.
https://youtu.be/N_pMrV2WfYE
