Oblys ákimi A. Batalov óziniń kirispe sózinde memleket qoldaýynyń nátijesinde óńirde sportty damytýǵa barlyq qajetti jaǵdailar jasalyp otyrǵanyn atap ótti. Máselen, ótken jyly dene shynyqtyrý jáne sport salasyna jergilikti biýdjetten 8 mlrd. teńge qarastyrylsa, biylǵy jyly bul soma 14 mlrd. teńgege jetip otyr.
– Sporttyń qoǵamda alar oryny erekshe. Sebebi, sport – ult mereii, rýhtyń kúshtiliginiń kepili. Táýelsizdik alǵannan beri kók bairaǵymyz kóptegen halyqaralyq jarystarda biikke kóterildi. Bul Prezidentimiz Nursultan Ábishuly Nazarbaevtyń sportqa jasaǵan qamqorlyǵy men sportshylarymyzdyń, bapkerlerdiń, osy sala mamandarynyń mańdai teriniń jemisi.Otandyq sporttyń damýyna jetisýlyq sańlaqtar da mol úles qosýda. Jerlesterimizdiń jarqyn jeńisteri kún sanap artyp keledi. Biz de óz tarapymyzdan sport nysandarynakúrdeli jóndeý jasaýǵa, qurylysyn júrgizýge, materialdyq-tehnikalyq bazasyn nyǵaitýǵa barynsha qoldaý tanytyp kelemiz. Budan bylai da bul qoldaýlar jalǵasyn tabatyn bolady. Sizderge myqty densaýlyq, tolaiym tabys, úlken jeńister tileimin, – degen A. Batalov odan ári marapattaý rásimin atqardy.
Atap aitqanda, ótken jyl qorytyndysy boiynsha Albert Linder, Karina Goricheva, Demeý Jadyraev úzdik sportshylar atandy. Sporttaǵy eren eńbekteri úshin olarǵa diplomdar men árqaisysyna 700 myń teńgeniń sertifikaty berildi. Budan ózge 28 sportshynyń jyl ishindegi jetistikteri úshin 150 myńnan 400 myń teńgege deiingi sertifikattar usynyldy. Olardyń qatarynda Olga Pastýhova, Anatolii Savelev, Jandos Ismailov, Begarys Sadýaqasov, Alena Stanskaia, Ulan Rysqul, Beibit Nazarov jáne basqalary da bar.
Jattyqtyrýshylar quramy da nazardan tys qalǵan joq. Jyldyń úzdik jattyqtyrýshylary bolyp Sergei Sedov pen Boranbek Qońyratov tanyldy. Sonymen qatar shákirtteri jeńis tuǵyrynan kóringen 20-dan astam bapkerlerdiń de eńbegi atalyp ótildi. Olar – Aleksei Klinovitskii, Ábilqaiyr Baibosynov, Manat Talaspaev, Azamat Balpyqov jáne t.b.
Kezdesý barysynda oblystaǵy
«Úzdik sporttyq federatsiia» atalymynda oblystyq grek-rim kúresi, erkin jáne áielder kúresi federatsiiasy qara úzip shyǵyp, 500 myń teńge aqshalai syilyqty ielendi. Al «Úzdik kásibi klýb» ataǵyn «Besarys» kógaldaǵy hokkei kásibi klýby jeńip aldy.
Sondai-aq sport taqyrybyna tóselgen tilshiler, fototilshiler, telejúrgizýshiler, beineoperatorlar, blogerlerdiń de eńbegi eleýsiz qalǵan joq.
Marapatqa ie bolǵandar atynan Taldyqorǵan qalasyndaǵy № 1 olimpiadalyq rezervtegi mamandandyrylǵan balalar men jasóspirimder sport mektebiniń direktory Vladimir Drozdov, oblystyq «Jetisý» gazetiniń jýrnalisi Rishat Turǵanbaev, dziýdodan QR sport sheberi, jastar arasynda dziýdodan ótken Álem chempionatynyń kúmis júldegeri Abiba Ábýjaqynova, «Qazaqstan Barysy – 2017» respýblikalyq týrniriniń kúmis júldegeri Ulan Rysqul jáne dziýdodan QR sport sheberi, Aziia chempionatynyń jeńimpazy Kamila Berliqash sóz sóiledi. Kórsetilgen jan-jaqty qoldaýlar úshin rizashylyǵyn bildirip, aldaǵy ýaqytta da jerlesterin, respýblika halqyn úlken jeńisterimen qýantýǵa bar kúsh-jigerlerin jumsaityndyqtaryn aitty.
Kezdesýdi qorytyndylaǵan oblys ákimi A. Batalov:
– Sizderdi búgingi marapattaryńyzben shyn júrekten quttyqtaimyn. Biylǵy jyly da jeńisti joldy jalǵastyryp, túrli jarystardan altyn, kúmis, qola medaldarmen oralatyndaryńyzǵa senemin. Sizderdiń sportta odan ári shyńdalyp, chempion bolýlaryńyz úshin biz qolymyzdan kelgen qamqorlyqty jasaimyz. Ózderińizben osyndai jyly júzdesýdi jyl saiyn dástúrli túrde uiymdastyratyn bolamyz, – dedi.
Jalpy Almaty oblysynda qazirgi kezde 3439 sport nysany jumys isteidi. Olardyń sany jyl saiyn artýda. Máselen, ótken jyly Raiymbek aýdanynyń Narynqol aýylynda, Qarasai aýdanynyń Jalpaqsai aýylynda fýtbol alańdary salyndy.Qaratal aýdanynyń Úshtóbe qalasyndaǵy sport mektebi, «Jetisý» kásipqoi fýtbol klýby bazasy kúrdeli jóndeýden ótti. Biylǵy jyly qurylys jumystary byltyr bastalǵan birneshe nysan - Raiymbek aýdanynyń Kegen aýylynda, Talǵar jáne Qaskeleń qalalarynda dene shynyqtyrý-saýyqtyrý keshenderi boi kóteredi.Sonymen qatar, Aqsý aýdanynyń Jansúgirov aýylynda jáne Qarasai aýdanynyń Shamalǵan aýylynda shynyqtyrý-saýyqtyrý keshenderiniń qurylysy josparlanýda. Oǵan qosa biyl Taldyqorǵan qalasyndaǵy sportta daryndy balalarǵa arnalǵan mektep-internattyń oqý ǵimaratyn kúrdeli jóndeý jumystary júrgiziledi. 2017 jyly Almaty oblysynyń sportshylary túrli deńgeidegi 1345 medal jeńip aldy (495 altyn, 372 kúmis, 478 qola). Ótken jyly 1 QR Eńbek sińirgen sport sheberi, 18 halyqaralyq sanattaǵy sport sheberi, 132 sport sheberi, 648 sport sheberligine kandidattar men 381 birinshi razriadtaǵy sportshylar daiyndaldy.
Almaty oblysy ákiminiń baspasóz qyzmeti
