Jezqazǵan qalasynda oblystyq bilim basqarmasynyń birqatar qyzmetkerine qatysty sot úkimi jariialandy. Olar biýdjet qarajatyn jymqyrǵany úshin aiypty dep tanyldy, dep habarlaidy Dalanews.kz.
Aiyptalýshylar qatarynda basqarma basshysy, onyń burynǵy orynbasary jáne bas býhgalter boldy. Tergeý málimetinshe, basqarma jetekshisi 2022–2023 jyldary eki adamdy formaldy túrde jumysqa qabyldap, olarǵa biýdjet esebinen zańsyz jalaqy tólegen.
Sonymen qatar 2022 jyly úsheýi aldyn ala sóz bailasý arqyly qarjylandyrý josparyna ózgeris engizip, artyq qarjyny syiaqy retinde úlestirgen. Bul tizimde ózderi de bar edi. Bas býhgalterdiń de zańsyz áreketteri áshkere boldy: ol shyn máninde bolmaǵan issaparlar úshin jol shyǵynyn tólep, turǵyn úi shyǵyndaryn da biýdjet esebinen japqan.
Sot dereginshe, 2023 jyly basqarma basshysy bul zańsyz shemany jalǵastyryp, igerilmegen qarajatty taǵy da syiaqy tóleýge baǵyttaǵan. Tipti is júzinde jumys istemegen adamdardyń atyna da aqsha aýdarylǵan. Sonymen birge orynbasaryna jáne tehnikalyq qyzmetkerlerge negizsiz “saýyqtyrý járdemaqylary” berilgen.
Osylaisha olardyń zańsyz áreketteri memleketke 93,2 mln teńge kóleminde zalal keltirgen.
Sot barysynda basqarma basshysy kinásin tolyq moiyndamasa, bas býhgalter tek issapar jáne turǵyn úi shyǵyndaryna qatysty bóligin ǵana moiyndaǵan. Soǵan qaramastan, ekeýi de biýdjet qarjysyn asa iri kólemde jymqyrǵany úshin kináli dep tanylyp, árqaisysy 8 jylǵa bas bostandyǵynan aiyryldy. Sonymen birge ómir boiyna memlekettik qyzmette jumys isteý quqyǵynan aiyryldy. Olar sot zalynda qamaýǵa alyndy.
Al úshinshi aiyptalýshy – basqarma basshysynyń burynǵy orynbasary – sot úkimi shyqpai turyp qaitys bolǵan.
Úkim zańdy kúshine áli engen joq.
