جەزقازعان قالاسىندا وبلىستىق ءبىلىم باسقارماسىنىڭ ءبىرقاتار قىزمەتكەرىنە قاتىستى سوت ۇكىمى جاريالاندى. ولار بيۋدجەت قاراجاتىن جىمقىرعانى ءۇشىن ايىپتى دەپ تانىلدى، دەپ حابارلايدى Dalanews.kz.
ايىپتالۋشىلار قاتارىندا باسقارما باسشىسى، ونىڭ بۇرىنعى ورىنباسارى جانە باس بۋحگالتەر بولدى. تەرگەۋ مالىمەتىنشە، باسقارما جەتەكشىسى 2022–2023 جىلدارى ەكى ادامدى فورمالدى تۇردە جۇمىسقا قابىلداپ، ولارعا بيۋدجەت ەسەبىنەن زاڭسىز جالاقى تولەگەن.
سونىمەن قاتار 2022 جىلى ۇشەۋى الدىن الا ءسوز بايلاسۋ ارقىلى قارجىلاندىرۋ جوسپارىنا وزگەرىس ەنگىزىپ، ارتىق قارجىنى سىياقى رەتىندە ۇلەستىرگەن. بۇل تىزىمدە وزدەرى دە بار ەدى. باس بۋحگالتەردىڭ دە زاڭسىز ارەكەتتەرى اشكەرە بولدى: ول شىن مانىندە بولماعان ءىسساپارلار ءۇشىن جول شىعىنىن تولەپ، تۇرعىن ءۇي شىعىندارىن دا بيۋدجەت ەسەبىنەن جاپقان.
سوت دەرەگىنشە، 2023 جىلى باسقارما باسشىسى بۇل زاڭسىز سحەمانى جالعاستىرىپ، يگەرىلمەگەن قاراجاتتى تاعى دا سىياقى تولەۋگە باعىتتاعان. ءتىپتى ءىس جۇزىندە جۇمىس ىستەمەگەن ادامداردىڭ اتىنا دا اقشا اۋدارىلعان. سونىمەن بىرگە ورىنباسارىنا جانە تەحنيكالىق قىزمەتكەرلەرگە نەگىزسىز “ساۋىقتىرۋ جاردەماقىلارى” بەرىلگەن.
وسىلايشا ولاردىڭ زاڭسىز ارەكەتتەرى مەملەكەتكە 93،2 ملن تەڭگە كولەمىندە زالال كەلتىرگەن.
سوت بارىسىندا باسقارما باسشىسى كىناسىن تولىق مويىنداماسا، باس بۋحگالتەر تەك ءىسساپار جانە تۇرعىن ءۇي شىعىندارىنا قاتىستى بولىگىن عانا مويىنداعان. سوعان قاراماستان، ەكەۋى دە بيۋدجەت قارجىسىن اسا ءىرى كولەمدە جىمقىرعانى ءۇشىن كىنالى دەپ تانىلىپ، ءارقايسىسى 8 جىلعا باس بوستاندىعىنان ايىرىلدى. سونىمەن بىرگە ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. ولار سوت زالىندا قاماۋعا الىندى.
ال ءۇشىنشى ايىپتالۋشى – باسقارما باسشىسىنىڭ بۇرىنعى ورىنباسارى – سوت ۇكىمى شىقپاي تۇرىپ قايتىس بولعان.
ۇكىم زاڭدى كۇشىنە ءالى ەنگەن جوق.
