№92 Mahatma Gandi atyndaǵy mamandandyrylǵan mektep litseide «Altyn belgige» úmitkerler kóp
Atalǵan mektep litseidiń daryndy shákirtteri ata-analary men muǵalimderiniń úmitterin aqtap, san alýan jarystar men saiystarda oza shaýyp báige aldy. Olardyń qatarynda «júzden – júirik, myńnan – tulpar» atanǵan «Daryn» respýblikalyq ǵylymi-pedagogikalyq ortalyǵynyń uiymdastyrýymen ótkizilgen ǵylymi joba jarystarynyń júldegerleri 11 «A» synyp oqýshylary Kóshkimbaeva Janiia, Shyndali Uldana, 11 «Á» synyp oqýshylary Dáýletqoja Dairbek, Shamerhan Amina, Izbasar Diana, Kalen Aiajan, qazaq tili men ádebietinen ótken qalalyq olimpiadada 2-oryn alǵan 11 «B» synyp oqýshysy Myrzamurat Aiym, XIV Prezidenttik olimpiada júldegerleri: 11-synyp oqýshylary Shyndali Uldana, Sabibolda Aqjan, Sháden Tomiris bar. Olar – mektep shejiresinde óz attaryn qaldyrǵan talantty jastar.
2022 jyly jaratylystaný-matematikalyq baǵyttaǵy №92 Mahatma Gandi atyndaǵy mamandandyrylǵan mektep litseidi 101 oqýshy bitiredi. Olardyń 14-i erekshe úlgidegi «Altyn belgi» attestatynan úmitkerler bolsa, Erekshe úlgidegi úzdik attestattan úmitkerler sany: 10.
Sońǵy qońyraý saltanatynda sóz alǵan «2014 jylǵy Úzdik pedagog» syilyǵy men QR Bilim jáne ǵylym ministrliginiń birneshe ret Qurmet gramotalarymen marapattalǵan, Almaty qalasyndaǵy №92 Mahatma Gandi atyndaǵy mamandandyrylǵan mektep litseidiń direktory Kýljan Saýytqyzy Shajabaeva túlekterge sát sapar tiledi:
"Ár túlegimizge memlekettik emtihanda jaqsy nátije kórsetýlerine tilektespin. Men sizderdiń ata-analaryńyz men ustazdaryńyzdyń senimderin aqtaityndaryńyzǵa kámil senemin. Mektep túlekteriniń bilimin shyńdaityn biik asý – Ulttyq biryńǵai testileýde shákirtterimizge tolaǵai tabys pen sáttilik tileimin. Egemen elimizdiń bolashaǵy – sizderdiń qoldaryńyzda, sondyqtan qai kezde de tereń bilim alý jolynda talmai izdenip, qajymas qairat pen muqalmas jigerdiń arqasynda el tizginin nyq ustar azamat bolýlaryńyzǵa izgi tilegimdi bildiremin. Qazaqstannyń mártebesin álemdik deńgeide arttyratyn sizdersizder! Qadamdaryńyzǵa sátti sapar, ómirlerińizge qutty qadam tileimin.
Kez kelgen el óziniń keleshegin óskeleń urpaǵymen bailanystyratyny sózsiz. Elimizdiń erteńi, memleketimizdiń jarqyn bolashaǵy bilimdi de bilgir jastardyń qolynda ekendigin nyq senimmen aitamyn. Endeshe, mektep pen onyń júregi – ustazǵa júkteletin júk aýyr. Oqýshyny zaman talabyna sai, álemdik ózgeristerge ilese alatyn básekege qabiletti tulǵa etip qalyptastyrý – búgingi kúnniń basty talaby, sondyqtan óskeleń urpaqqa sapaly bilim men sanaly tárbie berip jatqan muǵalimder qaýymyna aitar alǵysym sheksiz. Ulaǵatty ustazdarymyzdyń Jańa Qazaqstannyń bilimdi de bilikti ziiatker tulǵalaryn qalyptastyrýdaǵy eren eńbegine shyǵarmashylyq tabys tileimin!"
