2019 jylǵy 13 qazanda keshki saǵat 21:00 shamasynda Temirtaý – Nura –Nur-Sultan tas jolynda, Ahmet Nura aýylynyń aimaǵynda 34 jastaǵy Erlan Omarqulovty kólik qaǵyp ketti, azamat oqiǵa ornynda qaza tapqan.
Biraz ýaqyttan keiin qaza tapqan er adamnyń týystary ulyn qaǵyp ketken qara Leksýstyń qazaqstandyq shoý biznestiń juldyzy, komik Tursynbek Qabatovqa tiesili ekenin anyqtaǵan.
Osy oqiǵadan keiin ázilkesh óziniń Instagram paraqshasynda túsinikteme berdi.
«Assalaýmaǵaleikým, qazaq eli. Armysyzdar. Jelide, túrli paraqshalarda Tursynbek Qabatovtyń kóligi adam qaǵyp ketipti degen aqparattar tarap jatyr. Condyqtan shyndyqty ózim aitqandy jón kórip otyrmyn. Úndemei otyra almadym. Alla Taǵala kýá. Men bul istiń basynda bolǵan emespin. Bul bir jyl buryn 2019 jyldyń qazan aiynda bolǵan oqiǵa. Meniń kómekshim, mýzykantym keshke kelip, "bir jerge baryp keleiin" dep kólik surady. Oiymda eshteńe joq. Kiltti bere saldym. Jigitter jaǵy túsinedi. Arty bulai aiaqtalady dep oilaǵan joqpyn.
Keibir aqparat betterinde Tursynbektiń júrgizýshisi dep beripti. Meniń júrgizýshim joq. Kólikti ózim basqaramyn. Onyń buryn kólik júrgizýshi kýáligin kórgenmin. Sol ýaqytta qujatynan aiyrylyp qalǵanyn bilmeidi ekenmin. Ol da aitqan joq. Artynan osyndai oqiǵanyń Qaraǵandy tas jolynda bolǵanyn estidim. Tóbemnen jai túskendei boldy. Ońai bolǵan joq. Surastyra kele, marqum ózi kináli eken. Kishkene ishkeni bar. «Jolǵa júgirip shyqqan» deidi. Qazir marqumnyń artynan eshteńe aitqym kelip turǵan joq. Barlyǵy "delada" jazyldy. Kýágerler bar. Sodan álgi jigitke "qolyńmen istegendi moinyńmen kóter, men aralaspaimyn" dep aittym. Bireýler Tursynbek sheship tastady, aqsha berdi dep jatyr. Men eshkimge habarlasqan joqpyn, bul iske aralasqan emespin» depti.
Al marqumnyń anasy avtomobil iesiniń tanymaldylyǵy iske áser etkenine senimdi. Onyń ústine, ol prokýrorǵa jazǵan shaǵymynda is tipti óreskel protsessýaldyq buzýshylyqtarmen toqtatylǵanyn kórsetti.
Jol-kólik oqiǵasy kezinde Tursynbek Qabatovtyń kóligin basqarǵan júrgizýshi retinde is materialdary boiynsha 25 jastaǵy jigit ótip jatyr, ol oqiǵaǵa deiin júrgizýshi kýáliginen aiyrylǵan, bul, árine, oǵan avtokóliktiń saqtandyrý polisin jasaýǵa kedergi kelitrmegen, saqtandyrý polistine odan basqa Tursynbek Qabatov pen onyń týǵan aǵasy jazylǵan.
Jalǵyz ulynan aiyrylǵan marqumnyń anasy Dajan Omarqulova nelikten kópshiliktiń súiiktisi áli kúnge deiin jazaǵa tartylmaǵanyn túsinbeidi. Onyń aitýynsha, is materialdarynda Tursynbek Qabatov óz kóligin senip tapsyrǵan adamnyń kýáliginen aiyrylǵanyn bilgen jáne avtokólik quralynyń iesi retinde jaýap berýi tiis.
Marqumnyń anasyna eshkim jazbasha habar bermegen, ulynyń zattaryn alyp ketýdi aitpaǵan. Osylaisha, ony kólik quraly qaǵyp ketken kezde adamnyń turǵanyn nemese júrip kele jatqanyn anyqtaityn aiaq kiim boiynsha sot saraptamasyn júrgizý múmkindiginen aiyrǵan.
Sebebi, júrgizýshi Dadjan Omarqulovanyń uly joldyń júrý bóliginen ótip ketti dep málimdedi, japa shegýshiniń anasy oǵan senip otyrǵan joq.
Dadjan Omarqulova óz málimdemesinde júrgizýshi kinásin basqa tulǵaǵa aýystyrýǵa tyrysqanyn jáne jaiaý júrginshini tirkemesi bar kólik qaǵyp, ony shamamen 25-30 metrge súirep aparǵanyn aitady.
