Qazaqstanda 62 mln teńgeden astam bereshegin uzaq ýaqyt ótemegen boryshkerdiń júrgizýshi kýáliginiń kúshi ýaqytsha toqtatyldy, dep habarlaidy dalanews.kz.
Azamattyq ister jónindegi kassatsiialyq sot bul shekteý zańdy dep tanydy.
Sot málimetinshe, boryshkerdiń atqarýshylyq is júrgizý aiasyndaǵy ótelmegen qaryzy 62 mln teńgeden asady. Buǵan deiin jeke sot oryndaýshysy onyń múlkine tyiym salyp, inkassalyq ókimder shyǵaryp, elden shyǵýyna shekteý qoiǵan jáne múlkin izdestirý sharalaryn júrgizgen. Alaida bul áreketter sot sheshiminiń oryndalýyna áser etpegen.
Osydan keiin jeke sot oryndaýshysy boryshkerdiń júrgizýshi kýáliginiń qoldanylýyn ýaqytsha toqtatý jáne oǵan júrgizýshi kýáliginiń basqa sanattaryn alýǵa tyiym salý týraly sotqa usynys engizgen. Bul talapty birinshi jáne apelliatsiialyq satydaǵy sottar qanaǵattandyrǵan.
Boryshker júrgizýshi kýáligi óziniń negizgi tabys kózi ekenin aitqanymen, ony rastaityn dálelder usynbaǵan. Sondai-aq sot bereshekti óteýge kedergi keltiretin dáleldi sebepterdi anyqtamaǵan.
Kassatsiialyq sot «Atqarýshylyq is júrgizý jáne sot oryndaýshylarynyń mártebesi týraly» zańǵa sáikes, eger boryshker iri kólemdegi qaryzdy óteý jónindegi sot sheshimin dáleldi sebepsiz oryndamasa, mundai shekteý qoldanýǵa bolatynyn atap ótti.
Nátijesinde kassatsiialyq shaǵym qanaǵattandyrylmai, tómengi satydaǵy sottardyń sheshimderi ózgerissiz qaldyryldy.
