Qarjylyq monıtorıń agenttigi (QMA) búgin, 2025 jyly 22 qyrkúıekte Atyraý oblysynda zeınetaqy jınaqtaryn qylmystyq jolmen alýdyń aýqymdy shemasyna qatysty tyń málimetterge ıe vıdeomen bólisti, dep habarlaıdy Dalanews.kz.
Vıdeoda QMA BJZQ-dan zańsyz shyǵarylǵan aqshaǵa satyp alynǵan elıtalyq avtokólikterdi kórsetedi. Olardyń qatarynda mynandaı markalar bar:
- Mercedes-Benz G63,
- BMW XM 50E,
- BMW X7,
- Cadillac Escalade,
- BMW 7 Series,
- Mercedes-Benz GLS 450,
- Porsche Taycan,
- BMW X5,
- Toyota Land Cruiser 200,
- Lexus ES 300h jáne t.b.
"Jalpy, 200 mlrd teńgeden astam qarjy aınalymnan shyǵarylǵan ((BJZQ-dan – shamamen). Ol úshin jalǵan klınıkalar men 226 "dropper" paıdalanylǵan. Zeınetaqy salymshylarynyń aqshasyna kúdiktiler jalpy quny 600 mln teńgeden asatyn 15 qymbat avtokólik, sondaı-aq zergerlik buıymdar, komersıalyq nysandar, páterler men jer telimderin satyp alǵan", dep eske salady agenttiktiń baspasóz qyzmeti.
QMA qylmystyq jolmen alynǵan múlikti izdeý jumystary áli júrip jatqanyn atap ótti.
Aıta ketsek, 2025 jylǵy 11 qyrkúıekte qazaqstandyqtar tis emdetý úshin BJZQ-daǵy belgili mejeden artyq jınaǵan aqshasyn paıdalana almaıtyny belgili boldy. "Otbasy banki" 15 qyrkúıekten bastap Qazaqstanda stomatologıalyq qyzmetterge aqy tóleý úshin zeınetaqy jınaqtaryn paıdalanýǵa ótinishterdi qabyldaýdyń toqtatylǵanyn habarlady. 15 qyrkúıekte QMA jalǵan stomatologıalyq qyzmet boıynsha aýqymdy qylmystyq shemanyń beti ashylǵanyn málimdedi. Agenttiktiń málimetinshe, BJZQ-dan 30-dan astam jalǵan stomatologıalyq klınıka men 226 dropperdiń kómegimen 200 mlrd teńgeden astam qarajat shyǵarylǵan.
