Qazaqstanda halyqtyń tabiǵi gazǵa qoljetimdiligin keńeitý boiynsha aýqymdy jumys jalǵasýda. Sońǵy alty jylda eldegi gazdandyrý deńgeii 51%-dan 64,2%-ǵa deiin ósti. Osy kezeńde shamamen 4 mln qazaqstandyq tabiǵi gazǵa qol jetkizdi — gazben qamtamasyz etilgen halyq sany 9,1 mln adamnan 13,1 mln adamǵa deiin artty, dep habarlaidy dalanews.kz.
Osy jyldary gazdandyrý jumystaryna 1 myńnan astam eldi meken qamtylyp, 20 myń km gaz taratý jelisi salyndy.
Kórsetkishtiń ósýi gaz tasymaldaý jáne gaz taratý júielerin damytýǵa, sondai-aq jańa eldi mekenderdi gazǵa qosýǵa baǵyttalǵan infraqurylymdyq jobalardy iske asyrý nátijesinde qamtamasyz etildi.
Tek 2025 jyldyń qorytyndysy boiynsha 94 eldi mekendegi 354 myńnan astam turǵyn tabiǵi gazǵa qol jetkizdi. Bir jyl ishinde shamamen 2 myń km gaz taratý jelisi salyndy.
2026 jyly gaz infraqurylymyn damytý jumystary jalǵasýda. Qazirgi ýaqytta 40 joba iske asyrylýda, onyń ishinde 7 ótpeli jáne 33 jańa joba bar. Jobalardy iske asyrý aiasynda biyl taǵy shamamen 36 myń adam tabiǵi gazǵa qol jetkizedi dep kútilýde.
Soltústik óńirlerdi gazdandyrý úshin «Ishim – Astana» magistraldyq gaz qubyryn salý jobasynyń mańyzy zor. Ony iske asyrý jónindegi memorandýmǵa Qazaqstan Úkimeti men «Gazprom» arasynda qol qoiyldy. Joba Astana, Kókshetaý jáne Petropavl qalalaryn senimdi gazben qamtamasyz etýge, sondai-aq eldiń soltústik óńirlerine tabiǵi gaz jetkizý baǵyttaryn ártaraptandyrýǵa múmkindik beredi.
Gazdandyrýdy odan ári keńeitý Memleket basshysynyń halyqtyń tabiǵi gazben qamtamasyz etilý deńgeiin 2035 jylǵa qarai 80%-ǵa deiin jetkizý jónindegi tapsyrmasyna sáikes júzege asyrylady.
Gazdandyrý eldiń energetikalyq infraqurylymyn damytýdyń negizgi baǵyttarynyń biri bolyp qala beredi. Halyqtyń tabiǵi gazǵa qoljetimdiligin keńeitý ómir súrý sapasyn arttyrýǵa, óńirlerdi damytýǵa jáne Qazaqstannyń energetikalyq qaýipsizdigin nyǵaitýǵa yqpal etedi.
