Ánshi ári prodiýser Móldir Muqanova turmystyq zorlyq-zombylyqtan zardap shekken áielderge arnap "Solǵan gúl" atty án shyǵardy, dep habarlaidy dalanews.kz.
Óner iesi jańa týyndysyn qoǵamdaǵy aýyr oqiǵalardan keiin elge demeý, japa shekken jandarǵa jubanysh bolsyn degen nietpen usynǵanyn aitty.
Móldir Muqanova áleýmettik jelidegi jazbasynda bul taqyrypty bireýdiń qaiǵysyn paidalanyp tanymal bolý nemese qandai da bir adamnyń ólimine qatysty aiyp taǵý maqsatynda kótermegenin atap ótti.
"Meniń bul jazbam – bireýdiń ómirinen haip tabý nemese bireýdiń ólimine aiyp taǵý emes. Men jylaǵanda el jubatty, el jylaǵanda men jubatpaimyn ba?" – dep jazdy ánshi.
"Solǵan gúl" ániniń sózi men áýenin Erbolat Qaraqoishy jazǵan. Týyndyny Móldir Muqanova oryndady.
Ánge túsirilgen beinejazbada turmystyq zorlyq-zombylyq qurbany bolǵan Saltanat Núkenova men Madina Rashidovanyń, sondai-aq adam urlaý qurbany Nurai Serikbaidyń sýretteri paidalanylǵan.
Týyndynyń mátininde zorlyq kórgen áielderdiń aýyr taǵdyry sýretteledi. Ánde «Qiianat kórdiń be qabyrǵańnan», «Janym dep júrgender janyńdy alǵan» degen joldar kezdesedi.
Móldir Muqanova bul shyǵarmasy arqyly zorlyq-zombylyqtan zardap shekken áielderdiń taǵdyryna qoǵam nazaryn aýdarýdy kózdegen.
