Qazaqstandyq tazy ósirýshi Anna Zaharova Memleket basshysy Qasym-Jomart Toqaevtan syiǵa alǵan qolsaǵatyn satý týraly sheshiminen bas tartty. Ol bul buiymnyń ózi úshin jai ǵana baǵaly zat emes, Prezidentpen kezdesýden qalǵan erekshe estelik ekenin aitty, dep habarlaidy dalanews.kz.
Buǵan deiin Anna Zaharova Prezident syilaǵan saǵatty satylymǵa qoiǵan bolatyn. Onyń quny 2 mln 899 myń teńge dep kórsetilgen. Saǵattyń túpnusqalyǵyn rastaityn tiisti qujattary bar ekeni de aitylǵan.
Zaharovanyń sózinshe, qolsaǵatty oǵan Qasym-Jomart Toqaev 2023 jyly Naýryz merekesi kezinde syilaǵan. Sol kezdesýde tazy ósirýshi Memleket basshysyna bir jarym ailyq tazy kúshigin tartý etken. Prezident oǵan óz qoltańbasy qoiylǵan saǵat tabystaǵan.
Alǵashynda saǵatty taqpaitynyn aitqan Zaharova ony kollektsionerlerge usynýdy jón kórgen. Tipti ýaqyt óte kele mundai buiymnyń quny artyp, aldaǵy on jylda 30 million teńgege deiin baǵalanýy múmkin degen boljamyn da bildirgen.
Alaida satylym týraly aqparat taraǵannan keiin ol sheshimin ózgertip, saǵatty ózinde qaldyratynyn málimdedi.
«Bul jaǵdaiǵa qatysty túsinikteme bergim keledi. Eń aldymen, bul syilyqtyń men úshin árqashan erekshe qundylyǵy bolǵanyn atap ótkim keledi. Saǵatty alǵan sátten bastap ony jai ǵana zat retinde emes, Memleket basshysymen jeke kezdesken mańyzdy ári erekshe oqiǵadan qalǵan estelik syilyq retinde qabyldadym», – dedi Anna Zaharova.
Osylaisha, tazy ósirýshi Prezidentten alǵan syilyǵyn satpai, estelik retinde saqtap qalýǵa sheshim qabyldady.
