Qazaqstanda áleýmettik osal sanattaǵy azamattarǵa jeke turǵyn úi qorynan jalǵa alynǵan baspananyń aqysynyń bir bóligin sýbsidiialaý baǵdarlamasy júzege asyp jatyr. Baǵdarlama Memleket basshysynyń tapsyrmasyna sáikes iske qosylǵan, onyń operatory - "Otbasy banki", dep habarlaidy dalanews.kz.
Baǵdarlama boiynsha jaldaý aqysynyń 50 paiyzy memleket esebinen tólense, qalǵan 50 paiyzyn sýbsidiia alýshy ózi tóleidi.
2022 jyldan beri 45 514 otbasy sýbsidiia alǵan. Olardyń ishinde 34 246 otbasymen jasalǵan kelisim merziminen buryn toqtatylǵan. Onyń 20 424-i jalǵa beriletin nemese kredittik turǵyn úi alǵan, al 13 822 otbasymen kelisim baǵdarlama talaptary saqtalmaýyna bailanysty buzylǵan. Qazir 11 268 otbasy sýbsidiia alyp otyr.
Sýbsidiiaǵa birinshi jáne ekinshi toptaǵy múgedektigi bar adamdar, múgedektigi bar balalardy tárbielep otyrǵan otbasylar, jetim balalar jáne kópbalaly otbasylar ótinish bere alady. Bul rette otbasynyń ár múshesine shaqqandaǵy keiingi alty aidaǵy jiyntyq tabys kúnkóris minimýmynyń bir eselengen mólsherinen aspaýy kerek.
Sondai-aq, ótinish berýshi turǵyn úige muqtaj retinde ákimdikte esepte turǵanyn rastaýy qajet. Ótinish "Otbasy bankiniń" resmi saity arqyly beriledi.
Ótinishti rásimdeý kezinde turǵyn úi iesi jaldaý kelisimin ETsQ arqyly rastaýy kerek. Barlyq talap oryndalǵan jaǵdaida bank, sýbsidiia alýshy jáne úi iesi arasynda úshjaqty kelisim jasalady. Sodan keiin memleket óz úlesin kelisimde belgilengen merzimde tóleidi.
