Áleýmettik jelide Qyzylorda qalasynyń turǵyny ózin uzaq ýaqyttan beri belgisiz er adam ańdyp, psihologiialyq qysym kórsetip júrgenin málimdedi. Jábirlenýshi atalǵan jaǵdaiǵa qatysty quzyrly organdardan kómek te suraǵan. Ókinishke qarai, bul áreketi nátije bermegen, dep habarlaidy Dalanews.kz.
Jazira Qýanyshbai esimdi arý áleýmettik jelidegi paraqshasynda birneshe jazba jariialap, alty aidan beri stalkingtiń qurbany bolyp júrgenin jetkizdi. Aitýynsha, áli kúnge deiin belgisiz adam tarapynan qorqytý jáne psihologiialyq qysym jalǵasyp keledi. Osyǵan bailanysty ol politsiia men prokýratýraǵa 2–3 ret resmi aryz jazǵanyn, sondai-aq qaýipsizdigi úshin 102 nómirine jii habarlasýǵa májbúr ekenin alǵa tartty.
Jábirlenýshi aryzdarynda kúdiktiniń ańdyp júrgenin rastaityn foto jáne video dálelderdi politsiiaǵa tapsyrǵanyn jazǵan. Alaida onyń sózinshe, prokýratýra bul isti politsiiaǵa joldaǵan, al politsiia óz kezeginde qylmystyq quqyq buzýshylyq belgileri joq degen ýájben isti “nomenklatýralyq is”retinde jaýyp tastaǵan.
Áleýmettik jelidegi jazbalarynda jábirlenýshi jumys pen úi arasynda jalǵyz júrmeitinin, kúndelikti ómirde boiyn qorqynysh bileitinin aityp dabyl qaqty. Aitýynsha, barlyq áreket jasalǵanyna qaramastan, kúdikti tarapynan qysym áli de toqtamaǵan.
Sondai-aq jábirlenýshi E-Otinish platformasy arqyly Qyzylorda qalasynyń Politsiia basqarmasyna jáne Qyzylorda oblysynyń prokýratýrasyna birneshe ret júgingenin habarlady. Alaida ótinishteri naqty nátije bermegen. Qaita joldanǵan shaǵymdarǵa burynǵydai birdei mazmundaǵy jaýaptar kelgen.
“Meni mindetti túrde alyp qashyp, zorlaý kerek pe? Álde Nurai sekildi ólip qalǵanymdy kútý kerek pe?”, - dep kúiindi arý.
Sondai-aq jábirlenýshi bul jaǵdaidyń óziniń ǵana emes, ata-anasynyń, otbasynyń, týǵan-týystary men áriptesteriniń de júikesine aýyr salmaq túsirip otyrǵanyn atap ótti.
Qoǵamda rezonans týdyrǵan bul jazbalardan keiin birqatar jeli qoldanýshylary, onyń ishinde jýrnalister men belsendiler, jábirlenýshige qoldaý bildirip, isti qoǵam talqysyna shyǵarýǵa shaqyrdy. Keibiri quqyq qorǵaý organdaryn qyzdardyń qaýipsizdigine qatysty sharalardy qatańdatýǵa úndedi.
Qazirgi ýaqytta jábirlenýshi ózine naqty qaýip tónýi múmkin ekenin aityp, qoǵam men memlekettik organdardan naqty áreket kútetinin málimdedi.
