Aıtysker aqyn Balǵynbek Imashevtyń uly Danıar Imashev alaıaqtyq boıynsha tergelip jatyr, dep habarlaıdy Dalanews.kz.
Tergeýge ne túrtki boldy?
Qajylyqqa usha almaǵan bir top týrıs “Qazaq travel” kompanıasyna shaǵymdanǵan. Al Danıar Imashev atalǵan kompanıanyń atqarýshy dırektory bolyp qyzmet atqarady.
Bairaqmedia-nyń dereginshe, búginde qasıetti mekenge ushýy tıis bolǵan týrıser Áýezov aýdandyq polısıa basqarmasynyń aldyna jınalyp, jaǵdaıdy túsindirip berýdi talap etip jatyr. Sebebi “Qazaq travel” kompanıasy ushýǵa bir kún qalǵanda olardyń eshqaıda ushpaıtynyn habarlaǵan.
“Toǵyzy kúni ushatyn reısimizden eshqandaı adam ushpady. Tipti kompanıa halyqqa shyǵyp, úndeý de jasamady. Bılettiń baǵasy ósip ketti-aý, basqa da jaǵdaı bolyp qaldy-aý degen eskertý bolmady. Bizge eshqandaı dálel kórsetip turǵan joq. Bılet pen qonaqúı aqysy tólendi degen aqparat ta bolmady" , - dep málimdedi kompanıanyń klıenti Medına Jarylǵapova Bairaqmedia-ǵa.
Qazirgi ýaqytta “Qazaq travel” kompanıasynyń keńsesi jabylǵan. Mádına men Mekkege usha almaǵan 50-ge tarta adam polısıaǵa shaǵym túsirgen. Osydan keıin polıseıler alaıaqtyq deregi boıynsha qylmystyq is qozǵap, kúdikti retinde úsh adamdy tanyǵan. Olardyń arasynda Danıar Imashev ta bar. Al jýrnalıser onyń qajylyqtan qalý sebebin suraǵanymen, Danıar Imashev búgin ún qatpady.
Al, týyndaǵan qıyndyqtardyń sebebin qajyqqa attanbaq bolǵan qazaqstandyqtarǵa Balǵynbek Imashev túsindirip bergen. Aıtysker aqyn áýe bıletteri men qonaqúı baǵalarynyń qymbattaǵanyn jáne munda alaıaqtyqtyń joqtyǵyn málimdegen.
“Kóp adam týrdy aksıamen, arzan baǵada satyp alǵan. Qazir baǵa qymbattap jatyr. Qymbat bıletter alynýda. Ushaqtyń baǵasy men qonaqúıdiń baǵasy ósti. Sondyqtan quryltaıshylar óz qaltasynan qosymsha aqsha salyp, sizderdiń qyzmetterińizdi usynýǵa tyrysyp jatyr”, - dep túsindirdi Balǵynbek Imashev.
Alaıda Ýmraǵa usha almaǵandar onyń aıtqandaryna senbeı, tólengen qarajatty qaıtarýdy talap etýde. Olar “Qazaq travel” kompanıasynyń basqa musylmandardy aldamaýyn tileıdi.
Polısıa ne deıdi?
Atalǵan jaǵdaıǵa baılanysty Almaty polısıa basqaramasy resmı pikir bildirdi.
“Alaıaqtyq deregi boıynsha qazirgi ýaqytta Áýezov aýdandyq polısıa basqarmasyna qarasty bólimde qylmystyq is tirkelip, tergeý júrgizilýde. Búgingi tańda 50-ge jýyq azamattan aryz tústi. Qylmystyq is júrgizý zańnamasyna sáıkes barlyq qajetti tergeý áreketteri júrgizilip jatyr. İstiń obektıvti mán-jaılary anyqtalǵannan keıin tıisti prosestik sheshim qabyldanatyn bolady”, — dedi polısıa.
