Soltústik Qazaqstan oblysynda astyq qoimalaryn qasaqana órtep, 495 mln teńge kóleminde zalal keltirgen is boiynsha kassatsiialyq sot burynǵy sot sheshimderin ózgerissiz qaldyrdy, dep habarlaidy dalanews.kz.
Kassatsiialyq sot K.-nyń órt qoiýdy uiymdastyrǵany is boiynsha zerttelgen dálelderdiń jiyntyǵymen tolyq rastalady degen qorytyndyǵa kelgen.
Sottyń málimetinshe, dálelder qatarynda tótenshe jaǵdailar organdarynyń materialdary, oqiǵa ornyn qaraý hattamalary, órt-tehnikalyq zertteýlerdiń qorytyndylary, órttiń qasaqana qoiylǵanyn rastaityn derekter, kúdiktilerdiń telefon bailanystary týraly málimetter, sondai-aq jábirlenýshi men kýágerlerdiń jaýaptary bar.
Keltirilgen zalaldyń kólemi sottyń qurylys-ekonomikalyq saraptamasy arqyly rastalǵan.
Is materialdaryna sáikes, 2023 jyldyń mamyrynda sharýa qojalyǵynyń basqarýshysy K. basshysymen jeke janjaldan keiin basqa adammen birge Soltústik Qazaqstan oblysyndaǵy astyq qoimalaryn qasaqana órteýdi uiymdastyrǵan.
Órt saldarynan sharýa qojalyǵyna 495 mln teńge kóleminde materialdyq zalal kelgen.
Birinshi satydaǵy sot K.-ny Qazaqstan Respýblikasy Qylmystyq kodeksiniń 202-baby 3-bóliginiń 2-tarmaǵynda kózdelgen – bótenniń múlkin qasaqana joiý nemese búldirý, ony órt qoiý arqyly jasap, asa iri mólsherde zalal keltirý qylmysy boiynsha kináli dep tanyǵan.
Sot oǵan 6 jyl bas bostandyǵynan aiyrý jazasyn taǵaiyndap, keltirilgen materialdyq zalaldy óteýdi mindettegen.
Apelliatsiialyq sot birinshi satydaǵy úkimdi ózgerissiz qaldyrǵan.
Sottalǵan K.-nyń advokaty kassatsiialyq shaǵym túsirip, onyń kinási dáleldenbegenin alǵa tartyp, birinshi satydaǵy úkim men apelliatsiialyq qaýlynyń kúshin joiýdy suraǵan.
Alaida qylmystyq ister jónindegi kassatsiialyq sot buǵan negiz tappaǵan. Sot taǵaiyndaǵan jaza jasalǵan qylmystyń aýyrlyǵyna jáne zań talaptaryna sáikes keledi dep tanyldy.
Osylaisha, K.-ǵa qatysty buǵan deiingi sot aktileri kúshinde qaldy.
