Májilis depýtaty Samat Nurtaza áleýmettik jelidegi paraqshasynda bir jyl ishinde atqarǵan depýtattyq jumysyna sholý jasai otyryp, jeke basyna qatysty biraz qyzyqty aqparatty bólisti, dep habarlaidy Dalanews.kz.
“27 naýryzda “depýtatsyń” dep biraz kisi habarlasyp quttyqtady, biraq men tek resmi tizimdi kútip otyrdym. Telegram-kanaldar men saittarǵa shyqqanda ǵana kóńilim ornyna tústi. Tizim shyqty - telefon jaryldy. Sáýirdiń birinde naýryzdaǵy 3 kúnniń jalaqysy dep az-maz aqsha tústi.
Asa dinshil adam bolmasam da, sol aqshany yrymdap, meshitke aparyp, niet etip sandyqqa saldym. 28 naýryzda 98 depýtatqa 98 kómekshi keldi. Bireýler “óz kómekshim bar” dep Májilis usynǵan kómekshiden bas tartyp jatty. Maǵan Qudaiǵa shúkir jaqsy kómekshi buiyrdy. Óz jumysyn beske biletin, uqypty, tárbie kórgen, Dastan degen jigit”, - dep jazdy Samat Nurtaza.
Sonymen qatar ol qansha jalaqy alatynyn da ashyp aitty.
“Jalaqy 800.000tg. Depýtat bolǵanǵa deiin 4 jerde jumys jasadym, depýtat bolǵan sátte 4 jerden jumystan shyǵýǵa májbúr boldym, sebebi depýtattar qosymsha jumys jasaýǵa quqyǵy joq. Tek tvorchestvolyq jumystarǵa (sabaq berý, sýret salý, óleń aitý, sporttyq saiystar) ǵana ruqsat”, - dedi ol.
Aitýynsha, memleket tarapynan jańa qonys ta berilgen. Osy tusta ol kórshileri depýtat Rinat Zaiytov pen Ermurat Bápi ekenin jazǵan.
“15 sáýirde páter berdi. Ortasha keiipte, jihazy eskileý, kafeli 2005 jyldan beri aýyspaǵan, tósegi syqyrlaidy. Eki balkony bar. Kórshim Rinat Zaitov pen Ermýrat Bapi myrzalar. Aiyna 75 saǵat kólik aldyrýǵa ruqsat. Dúkenge, Mektepke, Bazarǵa, qalanyń syrtyna, Oiyn-Saýyq ortalyqtaryna barýǵa bolmaidy. Senbi-Jeksenbide mashina shaqyrýǵa bolmaidy. Keshki 20:00 keiin mashina shaqyrýǵa bolmaidy. Kúndiz tek úkimettik uiymdarǵa ǵana barýǵa ruqsat. Jumysqa jaiaý barǵannan, ol 75 saǵattyń aiyna ary ketse 10-15 saǵatyn qoldanasyń. Boldy”, - dedi depýtat.
Samat Nurtaza osy bir jyl ishinde úsh depýtattyq saýal aitqanyn jáne 7-8 ministrge suraq qoiǵanyn atap ótken.
“Depýtattyq Saýal - degen túsinik de qyzyq qubylys. Qoǵam “sóilegen depýtat jumys jasaidy - úndemegen depýtat jumys jasamaidy” dep oilaityn siiaqty. Olai emes. Depýtattyq saýaldy birneshe depýtat jasaidy, bireý jazady, bireý oi qosady, bireý qatesin jóndeidi. Oqityn adam bireý. Iaǵni “jazatyn jáne sóileitin depýtattar bar” dep aitýǵa bolady.
Máselen, 365 kúnde 3 depýtattyq saýaldy aityp, 15 shaqty saýalǵa óz úlesimdi qostym. Bireýden kóp, bireýden az degendei. Sonymen qatar Úkimet saǵaty ótken saiyn bir-bir ministrden kelip Májiliske esep beredi, sol jerde kez kelgen depýtat óz suraǵyn qoia alady. 7-8 ministrge sailaýshylar ótingen suraqty qoiǵanym bar”, - dep jazdy ol.
