2025 jylǵa qatysty jariialanyp jatqan ekonomikalyq statistikaǵa sáikes, Qazaqstannyń tamaq ónerkásibine salynǵan investitsiia kólemi aitarlyqtai artqan, dep habarlaidy Dalanews.kz.
Qz Economy.Taldaý telegram arnasy mán-jaidy tolyq tarqatyp jazdy.
Derekkóz málimetinshe, áńgime negizgi kapitalǵa baǵyttalǵan salymdar týraly sóz bolyp otyr.
"Negizgi kapitalǵa investitsiialar degenimiz – kásiporyndardyń óndiristi damytýǵa jumsaityn qarajaty. Buǵan ǵimarattar salý nemese jóndeý, qural-jabdyq satyp alý men jańǵyrtý, arnaiy tehnikany alý siiaqty óndiris qýatyn arttyrýǵa baǵyttalǵan shyǵyndar jatady", - deidi derekkóz.
Byltyr Qazaqstanda azyq-túlik óndirisine salynǵan mundai investitsiialar kúrt ósip, shamamen 390 mlrd teńgeni qurady. Al 2024 jyly bul kórsetkish 180 mlrd teńge shamasynda bolǵan edi. Osylaisha, ósim eki esege jýyqtap, keiingi jyldardaǵy rekordtyq deńgeige jetti.
Sarapshylar muny saladaǵy sapaly ózgeristiń belgisi retinde baǵalaidy. Iaǵni óndiris tek qoldanystaǵy qýatty arttyrýmen shektelmei, jańa kásiporyndar iske qosylyp jatyr.
Máselen, úkimet málimetinshe, 2025 jyly birqatar joba júzege asqan. Shyǵys Qazaqstan oblysynda "Altai-mai" kásiporny jylyna 169 myń tonna maily daqyldardy óńdeitin óndiristi iske qosty. Soltústik Qazaqstan oblysynda "Sever Agro LTD" táýligine 12 tonna qymyz óńdeý jobasyn bastady. Túrkistan oblysynda "Túlkibas jemis-jidekteri" SPK jylyna 5 myń tonna shyryn óndirýdi jolǵa qoisa, Kaz EcoMeat kásiporny 20 myń tonna et óńdeý qýatyn iske qosty.
Biyl da jańa óndirister sany arta túspek. Jambyl oblysynda Fufeng Group kompaniiasynyń júgerini tereń óńdeý jobasynyń birinshi kezeńi júzege asyrylýda, onyń qýaty – 300 myń tonna. Almaty oblysynda Fruit Art jobasynyń úshinshi kezeńi (25 myń tonna jemis-jidek) josparlanǵan. Sondai-aq "Shin-Lain" kásipornynyń balmuzdaq óndirisi jylyna 35 myń tonnaǵa deiin keńeitilmek.
Mańyzdysy – bul investitsiialardyń barlyǵy derlik biýdjetten tys kózder esebinen tartylǵan. Jalpy salymnyń shamamen 75 paiyzy nemese 290 mlrd teńgesi kásiporyndardyń óz qarajaty. Odan keiin banktik nesieler – 53,9 mlrd teńge, al banktik emes qaryz qarajaty – 46,3 mlrd teńge.
Sarapshylardyń pikirinshe, bul biznes tarapynan salaǵa degen senimniń joǵary ekenin kórsetedi. Nátijesinde ishki naryqta otandyq ónim kólemi artyp, importqa táýeldilik tómendeýi múmkin. Bul óz kezeginde baǵa turaqtylyǵyna da oń áser etýi yqtimal.
Osylaisha, tamaq ónerkásibi – Qazaqstan ekonomikasynyń biýdjet qarjysyna ǵana emes, naryqtyq investitsiialar esebinen de júieli túrde damyp kele jatqan salalarynyń biri.
