Túrkıanyń Ystambul qalasynda karate-do shotokannan jasóspirimder, jastar jáne eresekter arasynda álem chempıonaty ótti. Dúbirli synǵa ulttyq qurama sapynda qatysqan Túrkistan oblysynyń saıypqyrandary joǵary nátıjege qol jetkizdi. Olar Qazaqstan qorjynyna 3 altyn, 3 kúmis jáne 1 qola júldeni saldy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Atap aıtsaq, Elnur Tórebek, Marjan Áshim, Merýert Áben altynnan alqa taǵyp, el mereıin ústem etti. Al Madı Kateshov, Dımash Ýkmatov pen Oljas Qulajan kúmis medaldi ıelendi. Tartysty ótken karateshiler básekesinde taǵy bir jerlesimiz Erdos Qýandyq qola medaldi mise tutty.

Bul alaman dodaǵa túrkistandyqtardy karatedodan aǵa bapker Boranbaı Tóleev bastap bardy. Sonymen birge ortaq jeńiste bapker Roman Sársequlovtyń da úlesi bar. Tartysty ótken básekede Túrkistan oblysynyń №1-shi olımpıada rezerviniń balalar men jasóspirimderdiń mamandandyrylǵan sport mektebiniń eki shákirti altynnan alqa taqty. 61 kelide óner kórsetken Marjan Áshim men 52 keli salmaqtaǵy Elnur Tórebek Ánuranymyzdy sharyqtatty.

Atalǵan sport mektebiniń dırektory Berdaly Ádilbek Ystambul tórinde olja salǵan sportshylardy qabyldap, syı-qurmet kórsetti. Atalǵan mekemede sporttyń 10 túri boıynsha 1000-nan astam izbasar daıarlanyp jatyr. Sport mektebiniń shákirtteri álem chempıonattarynda 4 altyn, 2 qola enshilese, Azıa chempıonattarynda 1 altyn, 2 qola medal oljalaǵan.