200 oryndyq ınfeksıalyq aýrýhana kelesi aıdan bastap indetpen kúresti bastaýy tıis bolǵan. Alaıda aılyqty azsynǵan qurylysshylar jumys isteýge qulyqsyz.
Saldarynan karantın kezinde aýadaı qajet bop turǵan medısınalyq mekemeniń qurylysy kesheýildeýde. Jumysqa barlyǵy myń adam qajet eken. Alaıda qurylys kompanıasy tek 300 jumysshy jınaı alǵan.
Onyń ózinde basqa óńirlerden aldyrypty. Al jalaqysy 180 myńnan 250 myńǵa deıin barady. Oǵan qosa úsh mezgil tegin tamaǵy bar. Petropavldyqtar bul aılyqqa qyzyǵa qoımapty.
200 oryndyq provızorlyq ortalyqtyń qurylysy osy aıdyń sońynda aıaqtalýy tıis. Al qazan aıynan bastap munda indetpen kúresýge arnalǵan medısınalyq jabdyq jetkizilýi kerek.
250 myń aılyqqa jumysshy tappaı qınalǵan qurylys kompanıasy «ınfeksıalyq aýrýhanany ýaqtyly tapsyra almaıtyn boldyq» dep otyr. – Nege kelmeıdi dep oılaımyn. Biz olarǵa jaqsy jaǵdaı jasaımyz, kıim, kaska, tamaǵyn beremiz, nege kelmeıdi? Olarǵa aılyǵymyzdy aıtqanda, jumys ýaqytyn suraıdy. Jumys saǵat segizden keshki segizge deıin. Olar tek 8 saǵat jumys istegisi keledi, al bizde 12 saǵat, – deıdi kompanıanyń sharýashylyq jónindegi ákimshi Mıras Rahmetov.
