200 ورىندىق ينفەكسيالىق اۋرۋحانا كەلەسى ايدان باستاپ ىندەتپەن كۇرەستى باستاۋى ءتيىس بولعان. الايدا ايلىقتى ازسىنعان قۇرىلىسشىلار جۇمىس ىستەۋگە قۇلىقسىز.
سالدارىنان كارانتين كەزىندە اۋاداي قاجەت بوپ تۇرعان مەديسينالىق مەكەمەنىڭ قۇرىلىسى كەشەۋىلدەۋدە. جۇمىسقا بارلىعى مىڭ ادام قاجەت ەكەن. الايدا قۇرىلىس كومپانياسى تەك 300 جۇمىسشى جيناي العان.
ونىڭ وزىندە باسقا وڭىرلەردەن الدىرىپتى. ال جالاقىسى 180 مىڭنان 250 مىڭعا دەيىن بارادى. وعان قوسا ءۇش مەزگىل تەگىن تاماعى بار. پەتروپاۆلدىقتار بۇل ايلىققا قىزىعا قويماپتى.
200 ورىندىق پروۆيزورلىق ورتالىقتىڭ قۇرىلىسى وسى ايدىڭ سوڭىندا اياقتالۋى ءتيىس. ال قازان ايىنان باستاپ مۇندا ىندەتپەن كۇرەسۋگە ارنالعان مەديسينالىق جابدىق جەتكىزىلۋى كەرەك.
250 مىڭ ايلىققا جۇمىسشى تاپپاي قينالعان قۇرىلىس كومپانياسى «ينفەكسيالىق اۋرۋحانانى ۋاقتىلى تاپسىرا المايتىن بولدىق» دەپ وتىر. – نەگە كەلمەيدى دەپ ويلايمىن. ءبىز ولارعا جاقسى جاعداي جاسايمىز، كيىم، كاسكا، تاماعىن بەرەمىز، نەگە كەلمەيدى؟ ولارعا ايلىعىمىزدى ايتقاندا، جۇمىس ۋاقىتىن سۇرايدى. جۇمىس ساعات سەگىزدەن كەشكى سەگىزگە دەيىن. ولار تەك 8 ساعات جۇمىس ىستەگىسى كەلەدى، ال بىزدە 12 ساعات، – دەيدى كومپانيانىڭ شارۋاشىلىق جونىندەگى اكىمشى ميراس راحمەتوۆ.
