Jambyl oblysy T. Rysqulov aýdany ákimdiginiń apparaty shamamen 22 million teńgege qyzmettik joltalǵamaityn kólik satyp almaq. Memlekettik satyp alý portalyndaǵy málimetke súiensek, kólikke qoiylǵan tehnikalyq talaptar qoǵamda qyzý talqylanyp jatyr, dep habarlaidy dalanews.kz.
22,3 mln teńge bólingen
Memlekettik satyp alý konkýrsynyń qujattaryna sáikes, T. Rysqulov aýdany ákiminiń apparaty qyzmettik avtokólik satyp alýǵa 22,3 million teńge bólýdi josparlaǵan. Konkýrs qorytyndysy boiynsha jeńimpaz bolyp «AHH» JShS tanylyp, kólikti 21 575 300 teńgege jetkizýge usynys bergen, dep jazady dalamedia.
Qujattarda bul kólik «qyzmettik jeńil avtomobil» retinde kórsetilgenimen, tehnikalyq sipattamalary tolyq jetekti, qýaty keminde 218 at kúshine teń iri joltalǵamaityn kólikke sáikes keledi.
Kólikke qandai talaptar qoiylǵan?
Tehnikalyq sipattamaǵa sáikes, avtokólikte:
- jeti oryndyq salon;
- jasandy bylǵarymen qaptalǵan oryndyqtar;
- panoramalyq shyny shatyr jáne liýk;
- júrgizýshi men aldyńǵy jolaýshyǵa arnalǵan oryndyq massajy;
- oryndyqtardyń jeldetkishi jáne jady;
- úsh aimaqty klimat-baqylaý júiesi;
- salon elementteriniń jylytqyshy;
- róldegi berilis aýystyrǵyshtar;
- symsyz qýattaý qurylǵysy;
- shamamen 15 diýimdik mýltimediialyq ekran;
- tsifrlyq aspaptar paneli;
- 10 dinamigi, kúsheitkishi jáne sabvýferi bar aýdiojúie;
- «móldir kapot» fýnktsiiasy bar ainalany sholý kameralary;
- adaptivti krýiz-baqylaý;
- jolaqta ustaý júiesi;
- «soqyr aimaqtardy» baqylaý;
- jol belgilerin taný jáne basqa da elektrondyq kómekshi júieler bolýy tiis.
Basqa memlekettik organdardan qymbat
Bul satyp alý Jambyl oblysyndaǵy basqa memlekettik mekemelerdiń satyp alýlarymen salystyrylǵan.
Máselen:
- oblystyq aýyl sharýashylyǵy basqarmasy 18,6 mln teńgege avtokólik alǵan;
- dene shynyqtyrý jáne sport basqarmasy 11,1 mln teńgemen shektelgen;
- oblystyq máslihat apparaty 14,3 mln teńgege qyzmettik kólik satyp alǵan.
Al Shý aýdany ákimdiginiń ekonomika jáne biýdjettik josparlaý bólimi ótken jyly 15,4 mln teńgege kólik satyp alǵan. Onyń ózi bylǵary salon, klimat-baqylaý, intellektýaldy krýiz-baqylaý, symsyz qýattaý, qaýipsizdik júieleri jáne basqa da zamanaýi fýnktsiialarmen jabdyqtalǵan.
Osylaisha, T. Rysqulov aýdany ákimdigi josparlaǵan avtokólik quny óńirdegi kóptegen memlekettik organdardyń satyp alǵan kólikterinen joǵary bolyp otyr.
Suraq týdyrǵan jailylyq deńgeii
Aýdannyń jer bederi kúrdeli, shalǵai aýyldary men jol sapasy joltalǵamaityn kólikti qajet etýi múmkin. Alaida avtorlar panoramalyq shatyr, oryndyq massajy, jeldetkish, sabvýfer sekildi fýnktsiialar kóliktiń ótimdiligine emes, jolaýshylardyń jailylyǵyna ǵana qyzmet etetinin atap ótedi.
Sondyqtan mundai qymbat ári joǵary deńgeide jabdyqtalǵan qyzmettik avtokólik satyp alý biýdjet qarajatyn tiimdi paidalaný turǵysynan qoǵamda suraq týdyryp otyrǵany aitylǵan.
