Жамбыл облысы Т. Рысқұлов ауданы әкімдігінің аппараты шамамен 22 миллион теңгеге қызметтік жолталғамайтын көлік сатып алмақ. Мемлекеттік сатып алу порталындағы мәліметке сүйенсек, көлікке қойылған техникалық талаптар қоғамда қызу талқыланып жатыр, деп хабарлайды dalanews.kz.
22,3 млн теңге бөлінген
Мемлекеттік сатып алу конкурсының құжаттарына сәйкес, Т. Рысқұлов ауданы әкімінің аппараты қызметтік автокөлік сатып алуға 22,3 миллион теңге бөлуді жоспарлаған. Конкурс қорытындысы бойынша жеңімпаз болып «АХХ» ЖШС танылып, көлікті 21 575 300 теңгеге жеткізуге ұсыныс берген, деп жазады dalamedia.
Құжаттарда бұл көлік «қызметтік жеңіл автомобиль» ретінде көрсетілгенімен, техникалық сипаттамалары толық жетекті, қуаты кемінде 218 ат күшіне тең ірі жолталғамайтын көлікке сәйкес келеді.
Көлікке қандай талаптар қойылған?
Техникалық сипаттамаға сәйкес, автокөлікте:
- жеті орындық салон;
- жасанды былғарымен қапталған орындықтар;
- панорамалық шыны шатыр және люк;
- жүргізуші мен алдыңғы жолаушыға арналған орындық массажы;
- орындықтардың желдеткіші және жады;
- үш аймақты климат-бақылау жүйесі;
- салон элементтерінің жылытқышы;
- рөлдегі беріліс ауыстырғыштар;
- сымсыз қуаттау құрылғысы;
- шамамен 15 дюймдік мультимедиялық экран;
- цифрлық аспаптар панелі;
- 10 динамигі, күшейткіші және сабвуфері бар аудиожүйе;
- «мөлдір капот» функциясы бар айналаны шолу камералары;
- адаптивті круиз-бақылау;
- жолақта ұстау жүйесі;
- «соқыр аймақтарды» бақылау;
- жол белгілерін тану және басқа да электрондық көмекші жүйелер болуы тиіс.
Басқа мемлекеттік органдардан қымбат
Бұл сатып алу Жамбыл облысындағы басқа мемлекеттік мекемелердің сатып алуларымен салыстырылған.
Мәселен:
- облыстық ауыл шаруашылығы басқармасы 18,6 млн теңгеге автокөлік алған;
- дене шынықтыру және спорт басқармасы 11,1 млн теңгемен шектелген;
- облыстық мәслихат аппараты 14,3 млн теңгеге қызметтік көлік сатып алған.
Ал Шу ауданы әкімдігінің экономика және бюджеттік жоспарлау бөлімі өткен жылы 15,4 млн теңгеге көлік сатып алған. Оның өзі былғары салон, климат-бақылау, интеллектуалды круиз-бақылау, сымсыз қуаттау, қауіпсіздік жүйелері және басқа да заманауи функциялармен жабдықталған.
Осылайша, Т. Рысқұлов ауданы әкімдігі жоспарлаған автокөлік құны өңірдегі көптеген мемлекеттік органдардың сатып алған көліктерінен жоғары болып отыр.
Сұрақ тудырған жайлылық деңгейі
Ауданның жер бедері күрделі, шалғай ауылдары мен жол сапасы жолталғамайтын көлікті қажет етуі мүмкін. Алайда авторлар панорамалық шатыр, орындық массажы, желдеткіш, сабвуфер секілді функциялар көліктің өтімділігіне емес, жолаушылардың жайлылығына ғана қызмет ететінін атап өтеді.
Сондықтан мұндай қымбат әрі жоғары деңгейде жабдықталған қызметтік автокөлік сатып алу бюджет қаражатын тиімді пайдалану тұрғысынан қоғамда сұрақ тудырып отырғаны айтылған.
