Eks-ministr Qýandyq Bishimbaevtyń isine qatysty sot tergeýi de, sot jaryssózderi de aiaqtalyp, búgin aiyptalýshylar sońǵy sózderin aitty. Sarapshylar Bishimbaevtyń ómir boiyna sottalýy qanshalyq múmkin ekenin aitty, - dep habarlaidy Dalanews.kz.
"Chemodan gossekretov" telegram arnasynyń málimetinshe, Bishimbaev shartty túrde merziminen buryn bosatý quqyǵynsyz 20 jylǵa sottalýy múmkin.
"Iaǵni ol bostandyqqa qartaiǵan shaǵynda, 60 jasynda shyǵady. Ádette Qazaqstanda áielin óltirgender orta eseppen 15 jylǵa sottalady. Al bul jaǵdaida prokýratýra azaptaý bolǵanyn dáleldei aldy. Oǵan Bishimbaevtyń telefonynda tabylǵan videolar da dálel. Ómir boiyna sottalmaidy, onyń ústine muny Núkenovanyń aǵasy ǵana talap etip otyr.
Protsestiń ashyq ótýi bilik úshin utymdy boldy: osylaisha qazaqstandyqtar sot, advokattar qalai jumys isteitinin kórip, sot júiesi men prokýrorlarǵa senim arta tústi", - delingen jazbada.
Al saiasattanýshy Ǵaziz Ábishevtiń sózinshe, Bishimbaevtyń qorǵaýshylary ony shartty túrde merziminen buryn bosatý quqyǵymen 10-15 jylǵa sottaýdy suraǵan bolýy múmkin. Bul eks-ministr 7-8 jyldan keiin bostandyqqa shyǵýy múmkin degen sóz.
Alaida, saiasattanýshynyń sózinshe, bul boljamnyń oryndala qoiýy ekitalai.
"Sebebi onyń qylmys jasaǵanyn, qatygezdikpen óltirip, kómektespegenin dáleldei alatyn aiǵaq tym kóp. Al ómir boiyna bas bostandyǵynan aiyrý jazasy ádette birneshe adamdy óltirgenderge, kishkentai balalardy óltirgenderge jáne qoǵamǵa qaýip tóndiretin qylmyskerlerge taǵaiyndalady.
20-25 jyl aralyǵynda jaza taǵaiyndalýy ábden múmkin. Barlyq faktordy eskersek shartty túrde merziminen bosatý quqyǵy berilmeidi. Bárin satyp alýǵa qaýqary jetetin 44 jastaǵy Bishimbaev shirek ǵasyrǵa sottalýy múmkin. Ómiri temir tordyń ar jaǵynda ótedi. 2049 jyly 69 jasynda bostandyqqa shyǵady", - deidi sarapshy.
Eske salaiyq, búgin eki aiyptalýshy da - Bishimbaev pen Baijanov sotta sońǵy sózin sóiledi.
Kelesi sot otyrysy 10 mamyrǵa, saǵat 10:00-ge shegerildi.
"Kelesi sot otyrysynda alqabilerdiń qatysýymen sottyń sheshýine jatatyn suraqtardy talqylaý jáne tujyrymdaý ótedi. QPK-niń 653-babynyń 1-bóligine sáikes suraqtardy talqylaý jáne tujyrymdaý ýaqytynda alqabiler sot otyrysy zalynan shyǵyp ketedi", - dep habarlady Joǵarǵy Sottyń baspasóz qyzmeti ókilderi.
