ەكس-مينيستر قۋاندىق بيشىمبايەۆتىڭ ىسىنە قاتىستى سوت تەرگەۋى دە، سوت جارىسسوزدەرى دە اياقتالىپ، بۇگىن ايىپتالۋشىلار سوڭعى سوزدەرىن ايتتى. ساراپشىلار بيشىمبايەۆتىڭ ءومىر بويىنا سوتتالۋى قانشالىق مۇمكىن ەكەنىن ايتتى، - دەپ حابارلايدى Dalanews.kz.
"چەمودان گوسسەكرەتوۆ" تەلەگرام ارناسىنىڭ مالىمەتىنشە، بيشىمبايەۆ شارتتى تۇردە مەرزىمىنەن بۇرىن بوساتۋ قۇقىعىنسىز 20 جىلعا سوتتالۋى مۇمكىن.
"ياعني ول بوستاندىققا قارتايعان شاعىندا، 60 جاسىندا شىعادى. ادەتتە قازاقستاندا ايەلىن ولتىرگەندەر ورتا ەسەپپەن 15 جىلعا سوتتالادى. ال بۇل جاعدايدا پروكۋراتۋرا ازاپتاۋ بولعانىن دالەلدەي الدى. وعان بيشىمبايەۆتىڭ تەلەفونىندا تابىلعان ۆيدەولار دا دالەل. ءومىر بويىنا سوتتالمايدى، ونىڭ ۇستىنە مۇنى نۇكەنوۆانىڭ اعاسى عانا تالاپ ەتىپ وتىر.
پروسەستىڭ اشىق ءوتۋى بيلىك ءۇشىن ۇتىمدى بولدى: وسىلايشا قازاقستاندىقتار سوت، ادۆوكاتتار قالاي جۇمىس ىستەيتىنىن كورىپ، سوت جۇيەسى مەن پروكۋرورلارعا سەنىم ارتا ءتۇستى"، - دەلىنگەن جازبادا.
ال ساياساتتانۋشى عازيز ابىشيەۆتىڭ سوزىنشە، بيشىمبايەۆتىڭ قورعاۋشىلارى ونى شارتتى تۇردە مەرزىمىنەن بۇرىن بوساتۋ قۇقىعىمەن 10-15 جىلعا سوتتاۋدى سۇراعان بولۋى مۇمكىن. بۇل ەكس-مينيستر 7-8 جىلدان كەيىن بوستاندىققا شىعۋى مۇمكىن دەگەن ءسوز.
الايدا، ساياساتتانۋشىنىڭ سوزىنشە، بۇل بولجامنىڭ ورىندالا قويۋى ەكىتالاي.
"سەبەبى ونىڭ قىلمىس جاساعانىن، قاتىگەزدىكپەن ءولتىرىپ، كومەكتەسپەگەنىن دالەلدەي الاتىن ايعاق تىم كوپ. ال ءومىر بويىنا باس بوستاندىعىنان ايىرۋ جازاسى ادەتتە بىرنەشە ادامدى ولتىرگەندەرگە، كىشكەنتاي بالالاردى ولتىرگەندەرگە جانە قوعامعا ءقاۋىپ توندىرەتىن قىلمىسكەرلەرگە تاعايىندالادى.
20-25 جىل ارالىعىندا جازا تاعايىندالۋى ابدەن مۇمكىن. بارلىق فاكتوردى ەسكەرسەك شارتتى تۇردە مەرزىمىنەن بوساتۋ قۇقىعى بەرىلمەيدى. ءبارىن ساتىپ الۋعا قاۋقارى جەتەتىن 44 جاستاعى بيشىمبايەۆ شيرەك عاسىرعا سوتتالۋى مۇمكىن. ءومىرى تەمىر توردىڭ ار جاعىندا وتەدى. 2049 جىلى 69 جاسىندا بوستاندىققا شىعادى"، - دەيدى ساراپشى.
ەسكە سالايىق، بۇگىن ەكى ايىپتالۋشى دا - بيشىمبايەۆ پەن بايجانوۆ سوتتا سوڭعى ءسوزىن سويلەدى.
كەلەسى سوت وتىرىسى 10 مامىرعا، ساعات 10:00-گە شەگەرىلدى.
"كەلەسى سوت وتىرىسىندا القابيلەردىڭ قاتىسۋىمەن سوتتىڭ شەشۋىنە جاتاتىن سۇراقتاردى تالقىلاۋ جانە تۇجىرىمداۋ وتەدى. قپك-نىڭ 653-بابىنىڭ 1-بولىگىنە سايكەس سۇراقتاردى تالقىلاۋ جانە تۇجىرىمداۋ ۋاقىتىندا القابيلەر سوت وتىرىسى زالىنان شىعىپ كەتەدi"، - دەپ حابارلادى جوعارعى سوتتىڭ باسپا ءسوز قىزمەتى وكىلدەرى.
